Mes asam boguoti! Nautrānu kulturtelpa niu nacionalajā montuojuma sarokstā

Nautrānu pogosts Rēzeknis nūvodā zynoms ar apdzeivuotū vītu Rogovka, nu kurīnis guojuši daudzi latgalīšu kulturys, sabīdriskī darbinīki, literati i cīši aktivi cylvāki. Rogovkīši sataisejuši īvārojamūs cylvāku sarokstu – symtu personeibu, kuruos ir davušys sovu īguļdejumu kai Latvejis vaļsts izveiduošonā, tai kulturā i cytuos jūmuos, par pīmāru, muokslys zynuotnīks Juoņs Pujats, literats i muokslinīks Ontons Kūkuojs, vairuoki Saeimys deputati, latgalīšu volūdys kūpieja školuotuoja Veronika Dundure i vēļ cyti, taidu ir daudz.

Niu Nautrānu kulturtelpa Latvejis kartē īzeimāta kai eipaša kulturtelpa. Nacionalais namaterialuo kulturys montuojuma saroksts kotru godu teik papyldynuots ar vysaidom kulturys tradicejom, kas ir byutiskys Latvejis kulturys montuojumā. Itūgod saroksts papyldynuots ar sešim jaunim elementim, jūs vydā ari Nautrānu kulturtelpa.

Par namaterialū kulturys montuojumu vaļsts i lokalā lieminī, par Nautrānu kulturtelpu saruna ar Latvejis Nacionaluo kulturys centra puorstuovi, Latvīšu viesturyskūs zemu eksperti Martu Dziļumu, Nautrānu kulturys centra kulturys pasuokumu organizatoru Ingu Viguli, i kartografi Andru Zubko-Melni.

Inga Vigule soka, ka pats vierteiguokais nu Nautrānu kulturtelpys dasaceišonys montuojuma sarokstam ir sovys kūpīnys spāka, sovu atškireibu, sovu rakstureigūs eipašeibu apsazynuošona – „Mes īraudzejom, cik mes asam boguoti, cik daudz vēļ ir kū pieteit, saglobuot i nūdūt cytom paaudzem, i daudz mes varim dareit iz prīšku.”

Andra Zubko-Melne izsver: „Kotrā vītā ir sova boguoteiba. Ka mes gribim saglobuot sovu sovpateibu, ka gribim atteisteit sovu vītu, kurā dzeivojam, tod ir svareigi suokt ar inventarizaceju, kas mums ir, i nūspraust mierkus, iz kū mums tīktīs. Cytaiž mes varim lepuotīs ar vacim laurim i niu nadareit nikuo, i pazaudēt vysu, kas ir bejs. Jebkurai vītai, kura sevi apsazynoj, ka jim ir, ar kū lepuotīs, ir, iz kū tīktīs voi saglobuot tū, kas ir, vysu var izdareit, vajag tik suokt.”

Kab poši i cyti vaira dazynuotu par Nautrānu kulturtelpys viesturi i vierteibom i juos styprynuotu, oktobrī i novembrī, sadarbeibā ar latgalīšu kulturys kusteibu „Volūda”, rogovkīši reikoj lekceju cyklu.