Turpynojūt stuosteit par omotim, kuri Latgolā nazkod bejuši gūdā i tūs protuši daudzi, bet niu taidu meistaru palics vysā moz, dūdamīs iz Rēzeknis nūvoda Nautrānu pogosta Zaļmuižu pi kaļva Juoņa Ļubkys.


Kaļvs Juons Ļubka struodoj ar malnū metalu. Jis pīzeist, ka kaļva profeseja ir cīši dinamiska – uotrumam ir svareiga nūzeime, partū ka dorbs vysu laiku ir storp guni i vasari. Kab metals sakorstu, palyktu sorkons i byutu gotovs apstruodei, guņs temperaturai ir juobyut vysmoz tyukstūšai grādu. Kai izsver meistars, pi taida dorba intensivi juodzer pīns, kaba putekli nasakruoj plaušuos.


Juoņs stuosta, ka sovulaik juo dzymtajā cīmā iz treispadsmit sātu bejuši treis kalieji. Niu ar tū kaļva omotu Latvejā ir kai ir – vysā Latgolā tik kaidi treis palykuši.

Tautys lītiškuos muokslys tudeju „Zīle” Iļgucīmā kaļvs Juoņs Ļubka paraleli dorbam vagonu ryupneicā vadeja deveņpadsmit godu. Sovpus 90. godu suokumā puorbrauce atpakaļ iz Latgolu, iz Zaļmuižu. Sovulaik, pīcu godu laikā pīsadolūt trejuos vītejuos, divejuos republikys i vīnā strorptautiskā izstuodē, varēja pretendēt iz tautys dailomota meistara nūsaukumu. Taids Juoņam Ļubkam ari ir. Vēļ aizviņ Rēzeknis nūvoda Nautrānu pogosta Zaļmuižā jis kaļ vysmoz četrys stuņdis dīnā i pacīteigi gaida kaidu, kas  itū omotu byutu gotovs vuiceitīs.