Santa Šmite jau ūtrū godu ir naīrostuos naktsmītnis “Million star hotel” aba “Miļjons zvaigžņu vīsneicys” saimineica Viļakys nūvoda Susuoju pogostā. Burbuļteļts saimineica atkluoj, ka ideja par ituos vīsneicys formatu rodusēs aiz ziņkuoreibys.

“Norvegejā ir taidys muojenis kai igual i ar caurspeideigu jumtu i var zīmeļblazmu vāruot. Tai maņ itei ideja cīši patyka i tod es suoku vaicuot alternativys īspiejis, i maņ cīši patyka dūma, ka tys ir burbuļs, pīpyušams, vīglai izlīkams i vīglai nūjemams. Tod es suoku interesētīs, kai tys byutu praktiski i izaruodeja, ka Latvejā ir tikai vīna taida vīta, kas ir Līpuojā, i beja Jiurmolā, nu tuo eipašnīka, mes ari nūpierkom vysu burbuli. I atvedem iz Latgolu! Niu obūs Latvejis golūs ir pa burbuļam.”

Tai viņ puora kilometru nu Krīvejis rūbeža, ni vaira kai četru cylvāku kompanejā ir vareiba puorlaist nakti eipašā, saleidzynūši komfortablā, vajadzeibys gadejumā ari apsyldamā burbuļteļtī. Kai pīzeist Santa Šmite, leidz ar burbuļteļts pastateišonu Šmitu saimis idejis nibyut nav izsmaltys .“Itys beja atspierīņs, mes niule ar veiru dūmojam, kai atteisteit, varbyut vēļ kaidu muojeņu pastateit. Mums paraleli ari ir iz iudiņa projekteni. Kotru reizi, kod tu sateic cylvākus i jī pasoka “paļdis” voi pīzeimej kaidu kritiskuoku lītu, ir taida pīpiļdejuma sajiuta, ka dīna nav nūdzeivuota veļteigai. Ir radeita papyldu vierteiba.”