Oktobra vydā Ēriks Zeps beja nūbraucs iz Daugovpili, kaba Daugovpiļs Muola muokslys centrā sasatyktu ar keramikim Liliju Zeiļu i Juoni Saikovski. Niu ite par gūdu divejom jubilejom leidz pat cyta gods janvaram ir apsaverama izstuode „10x4”. Desmit godu jubileju itūgod svietej Daugavpils Muola muokslys centrs, sovpus 40.godskuorta aprit tautys lītiškajai studejai „Latgale”. Tuos dybynuošonu pīmiņ meistars Juoņs Saikovskis.

„Asu pateiceigs itai muokslinīku grupai, kuri beja vadeibā – Ugis Auzeņš, Indulis Folkmanis, Mārcis Stumbris – jūs laikā itys tyka izdūmuots i ari izdariets.Tī nabeja tukši vuordi i ite, blokus lielajai darbineicai, tyka izbyuvātys vēļ divejis darbineicys ar mierki paaicynuot Stanislavu Vylcānu. Leidz ar Stanislava i juo dāla īsarasšonu ite suoce ari veiduotīs studeja. Niu ite vēļ arviņ struodoj vaira nikai desmit meistaru. Asu pateiceigs itim muokslinīkim, ka jī sovulaik beja tuolredzeigi i ir prīca šudiņ redzēt darbineicys panuokumus.”

Gribīs izsvērt, ka ari tautys lītiškuos muokslys studejai „Rēzeknes apriņķa podnieki” i Latgolys pūdnīku dīnom itymā godā tyka sveiteita 40. jubileja. Lilija Zeiļa atkluoj, ka studejis dybynuošonys laikā keramikis skaitejīs kai muokslinīks. Profeseja bejuse pīteikami prestiža i ari stabila, niu gon pamatā kotrys sovā darbineicā struodoj pats iz seve i nazyna, cik kuru mienesi nūpeļneis.

 

 

 „Juoņs Pujats beja atbraucs iz Rēzekni i ite vadeja studejis kai lektors. Jis beja pyrmais, kurš atjaunuoja Latgolys keramiku Padūmu laikūs. Jis rajonūs i pogostūs radeja kūpys, īsuokumā juos struoduoja kai radūšī puļceni, tod ministreja daškiere jau studejis vuordu. Tai iz reiz tymā laikā par studeju naļuove sauktīs... Tai mes kotrys sovā piļsātā suocem struoduot. Tys vyss beja pakļauts Kulturys ministrejai.”

Lilija Zeiļa pīmiņ, kai jei suokuse sovu ‘muola ceļu’ izreiz piec muokslys školys pabeigšonys.

„Gondreiž kotrā piļsātā tūlaik beja apvīneiba „Daiļrade”, kurā mes daudzi sovulaik asam struoduojuši – stabila olga, rūku dorbs. Keramika skaitejuos Latvejis zeimyns – balzams, keramika, dzintars. Vysi brauce piec itaida monta. Ite mes variejom ari rodūši izapaust i pat taiseit, kū gribiejom.Golvonais beja kvalitate, tod jī poši nūcenuoja i puordeve. Beja stabilitate.”