Itūreiz raidejumā klausitēs sarunu ar muzikim, kas piec vuiceibom i dzeivuošonys Reigā ir atsagrīzuši atpakaļ Latgolā i niu jau vaira nikai pus goda dzeivoj i struodoj ite – Laimu un Aleksandrs Maslovim. Jī obeji niu muzicej profesionaluo pyušamūs instrumentu orkestra "Rēzekne" sastuovā, kai ari pīsadola vysaidūs muzykalūs projektūs. Runuosim par izaicynuojumim, īspiejom i sajiutom, dzeivojūt Latgolā. Atsagrīžšona obejim jaunīšim beja apzynuots i izsapynuots lāmums jau kaidu pruovu laiku.

****

Kulturys dzeive Latgolys pogostu tautys nomūs - AusmaSprukte beja nūbraukuse iz Rēzeknis nūvoda Leņdžu i Bieržgaļa pogostu kulturys nomim, kaba kluotīne pasarunuotu ar tūs vadeituojom. Nivīnam nav nūslāpums, ka, turpynojūtīs ‘Covid-19’ pandemejai vys vēļ vīni nu leluokūs īrūbežuojumu skar taišni kulturys dzeivi. Ausma Sprukte sovā sižetā itūreiz raudzeis dazynuot, voi Latgolys lauku pogostūs dzeivojūšim ite datryukst aktivuos kulturys dzeivis i kai tei teik organizāta niule.

****

Sieņs – grebiezis i glūmeizys - kluot sieņu laiks, ari Kolnasātys vuordineicā Ilze Sperga i Arņs Slobožanins stuosteis par vysaidom myusu mežūs atrūnamom sienim – grebiezem, glūmeizom, vuškinem, luocinem, žydu i cytom.