Saruna ar muzyku, muzykys pedagogu i Latvejis Radejis 2 personeibu Normundu Zušu.  Runuosim par juo dorbu radejā, kasdīnys izaicynuojumim pandemejis laikā, rodūšū dorbuošonūs šudiņ i juo meilom vītom, kas kai svietneica dūd spāku jaunim dorbim.
 
„Par tū, kai es tyku itymā sovā jaunajā omotā, tod tys stuosts suocās jau labi paseņ, kod es vēļ vuicejūs 9. klasē Rēzeknis 5. vydsškolā. Tūlaik es jau suoču struoduot vītejā radejā “Ef-Ei”. Piec tam asu pastruoduojs ari Latgolys radejā. Itys dzīšmu moderatora i raidejumu vadeituoja dorbs maņ vysod ir bejs cīši saistūšs. Maņ redzīs, ka jau tūlaik, kod es suoču struoduot vīteja radejā maņ dzyma sapyns, ka es nazkod varātu pastruoduot ari kaidā leluokā radejā, na tikai regionalajā. Laiks ir guojs iz prīšku i ar Latvejis Radeju 2 mums vysod ir bejuse taida draudzeiga  sadarbeiba saisteiba ar muzyku, ar dzīšmu atskaņuošonu, ar intervejom. I tai vīnā jaukā  dīna es sajiemu ari golvonuo redaktora zvonu, voi es nagrybu paraudzeit. Prūtams, ka es grybu paraudzeit.”

Nu ituo goda Normunds voda Latvejis Radejis 2  svātdīnis programu, kas nūzeimoj, ka reizi nedeļā jam ir juobrauc iz Reigu. Normunds stuosta, ka garuoku puorbraukuošonu laiks jam redzīs cīši svieteigs i nūdereigs.

„Myusu dzeivē nav nivīna breiža, kuru dreikstātu uzskateit par zemē nūsvīstu.

Pat tī breiži, kod tu atsapyut, verīs kinu ci losi gruomotu, tī ir breiži, kod tu voi nu izagleitoj, voi atsapyut, voi struodoj ar sevi. Puorbraucīni maņ saistuos taišni ar dūmuošonu, ar ideju generiešonu.”