Trešuo adventa prīškvokorā „Kolnasāta” gastej pi muzykaluos Rupaiņu saimis Rēzeknē. Itūreiz pi saimis golda sasatykom ar J. Ivanova muzykys vydsškolys školuotuoju, komponisti i Latgolys viestnīceibys GORS Muokslinīcyskuos i pasuokumu nūdalis vadeituoju Ilonu, juos veiru, muziki i J. Ivanova muzykys vydsškolys saimisteibys dalis vadeituoju Gunāru i jūs obeju dālu, vydsškolānu Kārli. Vacuokī bārni Maija i Juoņs niule dzeivoj Reigā i itūreiz nabeja kluotyn.

„Vysleluokais dzīduošonys laiks ir taišni Zīmyssvātki, kod sabrauc vysa saime. Nav duovonys bez dzīsmis, panteņus mes naskaitam,” tai Ilona.

Ilona pīzeist, ka nivīns nu jūs bārnu nav muzikis, bet bārnu muzykys školu pabeiguši vysi i koč cik ari muzicej i dzīd.

„Vacuokī bārni – gon Maija, gon Juoņs – ari ir pabeiguši muzykys školys klavīru klasi, saprūtams, ka jī nav pianisti, bet es asu cīši prīceiga, ka muzyka jim ir kluotyn asūša. Maija savulaik ari dzīduoja gon korī, gon folklorys kūpā „Vīteri”, gon piec tom, kod īsastuoja Reigys Tehniskajā universitatē, ari korī „Balsis”, tod saprota, ka navarēs itū apvīnuot ar dorbu i vuiceibom. Juoņs otkon dareja vysu tū pošu kū muosa, kai jau jaunuokī bruoli bīži viņ tū dora, ari guoja iz „Vīterim”, dzīduoja „Ezerzemē”, ari muzykys školā. Es jiutu, ka Juoņs vysvaira nu bārnu ir taids muzikis piec dobys. Tod, kod jis atbrauc iz sātu i mes paprosam koč kū paspieļuot, sadzīduot, ta jis ir tys, kurs par reizi jem gitaru i spieļoj. Es dūmoju, ka moz tryuka, kab jis aizītu muzykys ceļu.”