Ītūreiz raidejumā klausīs sarunu ar vaira nikai 20 godu Pīterpilī aba Sanktpīterburgā dzeivojūšū varakļuonīti Aini Pilikovu. Krīvejis muokslinīku savīneibys bīdrys, skulptors Ainis vēļ arviņ pa reizei brauc ari iz Latveju i Latgolu, taipat jis aktivi dorbojās ari Pīterpiļs latvīšu bīdreibā, kura naseņ svieteja sovu 30 godu jubileju.

„Es Krīvejā nadzeivoju, es dzeivoju Pīterburgā. Tei starpeiba vys tik ir lela. Gribim mes voi nagribim, tei latvīšu dzeive Pīterburgā turpynojās... Ka mes tai dziļuok viesturē aizejom, ta vysi slovonī latvīši vysaiduos jūmuos – muziki, uorsti i tai tuoļuok, jī vysi ir vuicejušīs ite.”

Ainim ite ir saime i dorbs. Kai pīzeits jis pats, vystycamuok iz dzeivi Latvejā naatsagrīzs. Vys tik jis reizi godā rauga nūbraukt iz dzimtini i pajimt leidza ari dālu.   „Par nuokūtni. Pats golvonais, lai jam byutu meilys i lobys atminis, lobi kontakti ar Latveju. Ka tai byus i jis pats gribēs, ta puorejais izreiz sasaliks.”

Taipat ar Aini runojam ari par dzeivi ite, sajiutom, latgaliskū i latviskū kasdīnā i saimē, muokslu i tuos tapšonys procesu.

 

***

Sovpus Ausma Sprukte gastēja Cyblys nūvodā, kab pasarunuotu par latgaliskom tradicejom i vierteibom vītejuos saimēs.

 

***

Dzīdova, doncova, runova, skolova, mozgova, sveicynova, zynova... Cik daudzi vuordu ar izskaņu -ovs, -ova tu zini i lītoj? Vuordineicā Ilze Sperga i Arņs Slobožanins, kai jau nūprūtams, stuosteis par vysaidim latgaliskim vuordim ar izskaņu -ova.