Itūnedeļ,17. junī, 75 godu vacumā pieški nūguojs myužeibā Pīters Luocs. Jis beja vīneiguo Latgalīšu rakstnīceibys muzeja ar pastuoveigu ekspoziceju veiduotuojs i saiminīks. Sovu myužu jis veļteja tāva bruoļa, trimdys latgalīša, gruomotu izdevieja Vladislava Luoča pamastuo montuojuma uzturiešonai i populariziešonai. Par īguļdejumu latgalīsu kulturys atteisteibā Pīteram Luočam 2009. godā padūta ari Latgalīšu kulturys goda bolva “Boņuks”.

Latgolys kulturys ļauds pīzeist, ka myusu kulturtelpai itys ir lels i nagaideits zaudiejums. 

“Eistineibā nav tūs patīsūs vuordu, ar kurim pasaceit, kaids zaudiejums tys ir Latgolai, Latgolys kulturai, jo Pīters Luocs beja tys, kurš beja īškā vysuos latgaliskajuos lītuos. Jis nikod nastuovēja molā, vysod atbaļsteja latgaliskū. Tik unikala cylvāka kai Pīters vēļ juopavaicoj. Jis ceņtēs saglobuot na tikai sovu radinīku davumu, bet ari vyspuor Latgolys davumu. Popularizēja Latgolys autoru dorbus, reikuoja daudzus pasuokumus,” literate Līvija Liepdruviete.

“Pīters Luocs ir cylvāks legenda, kuru es pats īpazynu, kod jis braukuoja apleik ar gruomotu goldim i tierguoja Vladislava Loča drukavuotuos gruomotys... Jis beja sova dorba dareituojs, sova ceļa guojiejs par speiti tam, ka atbaļsteituoji beja navysod," Latgalīšu kulturys bīdreibys vadeituojs Jurs Viļums.

“Pīters, uzcīteigs byudams, vysod vysu varieja paveikt vīns pats. Tū varēja apbreinuot. Jis prota vysus lauku dorbus i turpynuoja šū sova krystāva gruomotnīceibys lītu. Kaidys beja juo pādejuos dūmys? Tuos beja sareikuot izstuodi izcilajam goreidznīkam, literatam Pīteram Apšnīkam, kurs īt tepat nu Rēzeknis nūvoda,” tai ilggadejais kulturys darbinīks Pīters Keišs, paturpynuodams, ka vēļ pādejā dzeivis dīnā Pīters Luocs asūt bejs izdevnīceibā i sprīds par jaunom īcerem. Jis ni izmirkli nav bejs apsastuojs tymā, par kū jis daga.

 

Pītera Luoča izvadeišona nūtiks pyrmūdiņ, 22. junī, 9.00 stuņdēs nu sātys, 11.00 stuņdēs nu Rēzeknis Jezus Sirds katedralis. Zemis kliepī Pīteri guļdeis Rēzeknis Mīra īlys kopūs.