„Nazynamuo Rēzekne” apvīnoj ziņkuoreigus cylvākus: īguļdeit i atteisteit vītu

Kūpīna „Nazynamuo Rēzekne” ar dažaidom iniciativom jau 8 godus aktivi dorbojās Rēzeknis i Latgolys kulturtelpā, puļcejūt kūpā vysaidu profeseju i paaudžu cylvākus i veicynojūt pylsūniskū leidzdaleibu. Kūpīnā dorbojās ļauds, kuri pietej interesantus faktus par piļsātu, izdūta ari gruomota „Eisa Rēzeknis viesture”, reikoj lekcejis, ekspedicejis, tolkys, putnu vāruošonys pasuokumus, i īdrūsynoj sabīdreibu paust sovu vīdūkli.

Aktivitatis ir pamaneitys i nūvārtātys, i itūgod bīdreiba „Nazynamuo Rēzekne” nomināta Latgalīšu kulturys goda bolvai „Boņuks 2025”. Par bīdreibys padareitū, par nuokūtnis īcerem, kai nu mozys kūpīnys augt par lelu, i par latgaliskū Latgolā stuosta bīdreibys „Nazynamuo Rēzekne” puorstuovis Regita Zeiļa i Laura Spundere.

Kūpīna „Nazynamuo Rēzekne” dorbojās nu 2018. gods, kas roduos kai naformala iniciatīva, „kab vairuok izzynuotu Rēzeknis viesturi, taišni tū nazynomū, kam mes paskrīnam garom, i kū mes ari napamonom,” stuosta Regita Zeiļa, kura kūpīnā dorbojās nu poša suokuma. „Ite ir juopīmiņ Andris Uškāns, kurs kai viesturnīks ari suoka pieteit Rēzekni i gribēje vairuok par tū runuot i vairuok ari publicēt dažaidus stuostus, i tys ari rezultējēs mozā izzinis bukletā 2020. godā, kas tai i saucās „Nazynomuo Riezekne, ceļveds ziņkuoreigajim”. I es saceitu, ka „Nazynomuo Riezekne” eistineibā apvīnoj taidus ziņkuoreigus cylvākus, kuri grib na viņ izzynuot vaira, bet ari kūpā radeit pateikamu vidi, kūpīnu, kur var sanuokt i dareit.”

„Nazynamuo Rēzekne” apvīnoj kai viesturnīkus, tai dobys pietnīkus i cytu jūmu interesentus, „niu asam ari cīši plotai aizguojuši par dobu, par kūpīnys īsaisti. Itūgod vairuok dūmuosim par apkaimem Rēzeknē, kai jebkurš var uzajimt atbiļdeibu par vidi, kurā es dzeivoju,” pastreipoj Regita.

Laura Spundere „Nazynamajā Rēzeknē” suokuse dorbuotīs vāluok, tok saprotuse, ka tys jū iņteresej: „Myusu kūpīna niu ir dīzgon stabila, kaidi 10–15 cylvāki, kuri aktivi īsasaista. Prūtams, mes grybātum, kab cylvāki nasabeist i vairuok īt da mums.”

„Nazynuomuo Rēzekne” jau ir kļuvuse par zeimynu i dorbojās uorpus piļsātys rūbežim, īsasaistūt kai Latgolys, tai vysys Latvejis vaicuojumūs. Pārnejā godā izdūta ari Andra Uškāna gruomota „Eisa Rēzeknis viesture”, i Laura skaita, ka taišni par tū bīdreiba ir tykuse „Boņuka” nominantūs, „tei fokusejās pamatā iz Rēzeknis viesturi, bet ir gona daudz aspektu, kas ir saisteiti ar vysys Latgolys viesturi”.

Regita gon byušonu „Boņuka” nominantūs vaira redz par tū, „ka myusu pīmārs varātu ruodeit, ka latgaliskais var byut cīši dažaids, i ka Latgolys kultūrtelpu baguotynoj daudzveideigi pasuokumi, kas ari var byut kūpīnys radeiti. Par dažaidu temu aktualiziešonu, kas ir gon saisteitys ar Latgolys cylvākim, ar Latgolys viesturi, ar Latgolys kultūru, kū mes gribom saglobuot, ar kū mes lepojamīs, i sevkura aktivitate, kū mes doram, patīseibā ir ar golvonū mierki, kab īdzeivuotuoji pasavārtu iz apkuortni sovaižuok. Otkon īmīlēt tū vītu, nu kurīnis tu nuoc, kur tu dzeivoj, tys ir byutiski. Mes varim pylnvierteigi īguļdeit i atteisteit tū vītu.”

Voi bīdreibya par pārnejā godā padareitū sajims Latgalīšu kulturys goda bolvu „Boņuks”, zynuosim 14. martā, kod Latgolys viestnīceibā GORS nūtiks apbolvuošonys ceremoneja, tū varēs ari tīšraidē klauseitīs LR1 i vērtīs LSM.lv, kai ari vokorā LTV1.