Ar Rībeņu nūvoda jaunīšu lītu specialistu, jaunīšu centra “Pakāpieni” vadeituoju i aktivu vysaidu rodūšūs kolektivu vadeituoju i ari dalinīku, pasuokumu vadeituoju Oskaru Bierzeņu raidejumā “Kolnasāta” sasatykom ari pyrma diveju godu, kod jis tikū beja nu Leivuona puorsacieļs iz Rībenim i suocs ite struoduot. Tod vaicuojom, deļ kuo pījimts taids lāmums i kaidi niu ir izaicynojumi. Sovpus šudiņ varim runuot jau par divejim dorba godim kulturys jūmā ite i sajiutom niu. Te gon juopīzeimej, ka Oskars niu ir vysai atpazeistams Rībeņu nūvoda puorstuovs, kurš ar sovu plotū smaidu,  izadreikstiešonu i humora pylnū komunikaceju ir labi pazeistams ari škārsteiklā, nu vysmoz  ar sovom pandemejis laika virtualajom balleitem laivā (live).

Par dzeivi Rībeņu nūvodā i ituo lāmuma svoru i pareizumu sovā dzeivē Oskars Bierzeņš ir cīši prīceigs.Jis pīzeist, ka ite jis teišom jiutās nūvārtāts, dorūt tū, kas jam pateik i saīt. “Pats, pats svareiguokais ir, ka cylvākam ir tei atgrīzenyskuo saite. Tu koč kū izdareji, tev saguoja i tev pasoka ari paļdis. Tys vuords paļdis, vysmoz deļ mane ir cīši svareigs.”

Vaicuots par juo liderim, kuru redzīņs i atzineiba jam ir vysasvareiguokuo, Oskars pīzeist, ka tei nūteikti ir juo saime – tāvs i muote. “Mes kotrys dzeivojam sovu dzeivi i tova saime ir tovs atskaitis punkts, kur tu sajem gon uzslovu, gonpierīni.”

‘Covid-19’ pandemejis deļ vaļstī izsludynuotuo uorkuortejuo stuovūkļa suokumā Rībeņu nūvods socialajūs teiklūs izacēle ar sovom dzeivajom balleitem “Kronis visam”.

“Mes izmontuojom tūs sanitarūs protokolus i vaļsts nūsceituos drūseibys normys sev par lobu. Ka jī mums saceja, ka pasuokumā var izaklaideit divdesmit pīci cylvāki ar distaņci i mozguotom rūkom, tod mes tai ari darejom– uztaisejom pasuokumu divdesmit pīcim cylvākim. Atļuove trejim symtim, uztaisejom pasuokumu trejim symtim.

Nagulejom iz laurim, bet turpynuojom augt. Vyspuor pošā ‘Covid-19’ pandemejis suokumā mes suocem divatā, es i kulturys centra vadeituoja Ilga Pokšāne. Siedejom kabinetā i mums beja raidejums “Kronis visam”, ar kuru mes pīcys reizis izguojam Facebook ‘laivā’. Tai mes ari sacejom, navys 'live', bet laivā. Tys vyss beja drupeit taida kai parodeja par pošim, par situaceju vaļdeibā, par koč kaidim nūsacejumim, kai izdzeivuot krīzē. Tai mes tū vysu pa divejom, divejom ar pusi stuņdem apspieliejom.  Kotrys raidejums beja dzeivajā, bez nikaidu īrokstu. Cīši labi aizguoja i mes paskaitejom, ka mums ar tim pīcim raidejumim beja koč kur 70 000 skatejumu. Piec tom izreiz beja pasuokums aizsorgtārpūs itys tod ari cīši tuoli izskanēja, pat Lītovā par mums runuoja.” Kai pīzeist pats Oskars, tys niu ir otkon jiutami paplašynuojs Rībeņu nūvoda kulturys pasuokumu auditoreju.

“Latgalīšim byutu juopuorstuoj daleit koč kaidu montu i sevi pīruodeit, vīnkuorši dorit i apsavīnojit. Maņ grybātūs, lai Latgolā tai nūtyktu. Pagaidom ir dīzgon jiutams, ka mes asam kotrys nūvods pats par sevi.

Vīnam tys, ūtram itys, vīnam pareizuoka volūda, kurš vēļ nu tribinis bļaun, ka vajag tīseibys i vēļ tī koč kū. Nu vajadzātu drupeit apsamīreit. Vīnkuorši dorim tū, kas mums saīt i dorim nu vyslobuokuos sirdsapzinis. Tū es ari nūvieleju latgalīšim.”