Gruomotu redaktore, filologejis doktore, publiciste, prozaike i vasalu septeņu Latgalīšu kulturys goda bolvu „Boņuks” sajiemieja Ilze Sperga. Taipoš jei sovulaik struoduojuse pi pyrmū „Kolnasātys” raidejumu, kūpā ar tuos veiduotuojim sovulaik sprīduse kū i kai lobuok izdareit. Ilze atkluoj, ka tūlaik i ari tagad, tei beja lela prīca par raidejumu latgaliski.

„Itei ir radejis kai medeja atbiļdeiba, jo, kū vaira tys vuords izskaņ, tū vaira jis nūsastyprynoj cylvāku volūdā, runuošonā, dūmuošonā.”

Par latgalīšu volūdys lītuošonu i ar tū saisteitim streidim Ilze soka ari itai:

„Gosts, gaška, vīss, vīšņa, varbyut tys pat ir normali cikom nav vīnys taidys normātys pareizraksteibys vuordineicys, kur var viļkt ar pierstu i ruodeit, ka ir tikai itai i nikai cytaiž. Tai nikod ari nabyus, jo vysod byus paralelī varianti, mes tok nadzeivojom totalitarā vaļstī.

Dūmoju, ka vajag mozuok par itim vaicuojumim spuoruotīs i raudzeit viļkt sovys saknis, pīminēt, kai saceja muna baba, tāvs, muote.”

Koč gon vēļ šudiņ ari poši latgalīši spuoruojās par tū, kai pareizi raksteit latgalīšu volūdā, pa „jaunam” voi pa „vacam”, jau 2007. goda septembrī Vaļsts volūdys centra ekspertu komisejis Latgalīšu ortografejis zamoškkomiseja ir izdavuse latgalīšu pareizraksteibys nūsacejumus.

„Myusdīnu ortografejis nūsacejumi, kas atrūnami likumi.lv atļaun raksteit ar garū „ō”, bet ir daudz cytu normu, kurys nivīns naīvāroj. Koč voi tys pats divskaņs „ie”, kas piec 1933. goda nūsacejumu byutu juoroksta kai „ē”. Pērtī pērtīs, tai burtiski puorskaitūt. Tai nivīns narunuos i naraksteis. Ir juoīt iz prīšku i juolītoj tei volūda. Vīnkuorši roksti tai, kai tu roksti, bet atbylstūši raksteibys normom.”

Ite gon Ilze nūruoda, ka nikas nav akminī īkolts i laikam īmūt mainuos. Juosamaina.

„Jaunī ortografejis nūsacejumi ir 2007. goda, taipoš kai muna mašina i es jau verūs, ka jei ari taida pavaca. Laiks i dzeive īt iz prīšku. Tuo vītā, lai kaseitūs kai pareizi pīrakstei vīnu i tū pošu burtu voi skaņu, eistineibā tys jau seņ ir atrysynuots.”

Jau kaidu ilguoku laiku Ilze sevi jiut i sauc par sātys saimineicu.

„Muna kasdīna breižim ir taida saprūtama, breižam na cīši. Ir dorbs i divi mozi bārni, kas iz maiņom slymoj. Gola beiguos, ka es tik ilgi asu dzeivuojuse bez bārnu, deļ kuo es tagad navaru dzeivuot ar bārnim. Tys, eistineibā ir forši. Tuos pērlis, kū jī sper uorā.”

Paraleli saimnīkuošonai sātā Ilze ari struodoj i roksta. Jei atkluoj, ka sovus tekstus vysod iztvāruse i iztver kai taidu tvaika nūlaisšonu.

„Spīdīņs sasakruoj i tod tys vyss īt uorā. Maņ vaira pateik fantazēt nikai vērtīs olūtūs. Skaidrys, ka es par Trasunu nikod romanu napīraksteišu, ka jis byus Trasuns, to tys nabyus jis.”

„Tūs, kurī var puorskaiteit latgalīšu literaturu i saprast ir moz. Vēļ mozuok taidu, kurī var dūt tev koč kaidu kritisku atsauksmi.”

*****

Guntas Ločmeles stuostā klausitēs par bīdreibys „Asmu Latgalīts” Latgolys goda bolvu, kas itūgod Preiļūs tiks padūta jau pīktū reizi.

*****