Ar Latvejis radejis žurnalisti i raidejumu vadeituoju Dairu Zīli, kura sovulaik bejuse ari raidejuma "Kolnasāta" producente,  Latgolys regionaluos televizejis žurnalisti Ausmu Sprukti i žurnalistu, TV raidejumu vadeituoju Gustavu Terzenu runuosim par latgalīšu volūdu medejūs, tuo vydā ari tuos vītu sabīdryskajūs plošsazinis leidzekļūs. Kur, cik daudzi var i  vajag runuot latgaliski.

"Mes naizavielejam volūdu i kulturu, kurymā mes pīdzimstom. Ar mums tys vīnkuorši nūteik. Īsadūmojit, ka itei volūda jius saista ar pošu pyrmū latgalīti. Īsadūmojit, kaidu kontekstu jius sevī nesit caur volūdu, kaida ir jiusu vissenejuokuo atmiņa par sevi. Kū jius turpynojit? Tei ir miļzeiga atbiļdeiba. Īsadūmojit, mes dzeivojam itaidā moza teritorejā, i ka ite vēļ sova storpā streidēsimēs i nalūluosim. Nikuo loba nabyus."

Tai par latgalīšu volūdu soka Gustavs Terzens, kurš izsver, ka tei mums ir vysim spākim i veidim juokūp. Apdūmeigi gon, lai vyss ir dabiski, napuorspeilejūt i naizsaucūt pretesteibu.

"Cīši pluons lads, pa kuru mes staigojam. Tai ar varu navajag, jo vysam, kas teik tai cīši spareigi, ar varu, agri voi vieli roda pretesteibu...

Tys latgaliskais spāks, elpa i tei pacīteiba, ar kuru jius vysod asit bejuši apveļteiti, zynomā mārā ari varoneiba. Ar cīši atjauteigom viļteibom sasaglobuot, taipat kai tys leidz šam ir bejs. Tei pošsasaglobuošonys energeja ir juopavierš taidā produktivā, konstruktiva gultnē. "

Varbyut byusit pamanejuši, ka pa reizei žurnaliste Ausma Sprukte nūvodu ziņu sižetūs sovus stend-up tekstus īrunoj latgaliski. Jei  atkluoj, ka jau puora godus ik janvari ar kanalim ReTV i LTV  jai par itū atsajaunoj diskusejis.

 "Jī maņ tai kai puormat, ka es nadreikstu kamerys prīškā, sovus stand-up tekstus ziņu sižetim runuot latgaliski. Kotru godu itei diskuseja atsajaunoj, es palīku pi sovys nūstuojis, jī pi sovys i tai tys apsastuoj leidz cyta goda suokumam."

Ite vaicuojam ari piec skaidruojuma pi jurista, zvārynuotuo advokata i latgalīša Agra Bitāna.

"Skaidrys, ka šūbreid  cylvāki dzeivoj Latvejā voi cytur pasaulī i vys vēļ dūmoj, ka latgaliskais nav latvyskais, voi ir napareizais latvyskais, logiski jim tod var veiduotīs taids prīškstots, ka juobyun koč kaidai specialai atļuovei. Bet, ka mes veramīs nu lykuma, nu Vaļsts volūdys lykuma 3. panta 4. dalis, tī ir saceits, ka latgalīšu volūda ir latvīšu volūdys paveids. Viesturiskais latvīšu volūdys paveids."