Doba mums apleik ir breineiga i puorsteidzūšu atkluojumu pylna kotru godalaiku, kotru šaļti. Saruna ar gleznuotuoju, gleznuošonys i zeimiešonys školuotuoju, muokslineicu apvīneibys V.I.V.A. dalineicu, 2020. goda Jāzepa Pīguožņa vuordā nūsauktuos bolvys ainovu gleznīceibā sajiemieju Agru Ritiņu. Agra sovūs dorbūs ir i palīk uzticeiga dobai, dobys nūtikšonu fikasacejai i zīdu kompoziceju atainuošonai.  


„Eistineibā pat jau itys breids, kod lopys vēļ nasataisa vaļā, kūkim zori jau ir kruosaini. Ka brauc niu i eipaši tod, ka speid saule, mums ir pylnys cela molys ar kūkim i kryumim. Es vysod soku, ka ir cīši jauki, ka mums ir tī kryumi, jo tī atsakluoj fantastiskys kolorits. Trauslys, smolks i tymā pošā laikā cīši gleznīciskys.”


Agra pīzeist, ka kotra izstuode muokslinīkam ir svareiga i zeimojās kai taida psihologiska seve sakuortuošona.


„Tymā vuiceišonuos periodā, ari tod, ka kaids sauc tevi par muokslinīku, gleznuotuoju, tu taids vieļ nasajiuti. Tod tys maņ pat tai eisti napatyka. Tod ir vīns breids, kod tu saprūti, ka ir. Tovs atskaitis punkts ir skaidrys. Tu tū biļdi nūlic i jau esi gotovs nest i ruodeit citim.

Pats golvonais atskaitis punkts tu esi pats sev. Tev ir puorlīceiba, ka esi paruodejs tū, kū gribieji. Maņ niu jau ir tys psihologiskais moments, ka teišom, tu ej iz tū darbneicu na vaicuot ceļus, koč kū ruodeit, pīruodeit, bet vīnkuorši baudeit.

Baudeit car kruosom, car kruosu smuordu, car procesu, car saīšonu i nasaīšonu. Tei ir ari taida parunuošona pošam ar sevi i tymā pošā laikā, kod tu lic koč kū iz tuo audakla, tod tei ari ir koč kaida dūmu sakuortuošona, laukumu sakuortuošona i pi reizis ari sevis sakuortuošona.”


Niu, vēļ leidz 10. apreļam Daugovpiļs Marka Rotko muokslys centrā apsaverama Agras izstuode „Kronis”.


„Itū vuordu munai izstuodei īdeve Māris Čačka, kod jis maņ izstuosteja i pamatuoja itū vuordu, nu nui. Krūņs, kas krūņs. Respektivi, tei kompoziceja kluojās, ir zeme, dabasi i tod muni tī golvonī varūni ir kūku puduri, kryumu puduri, puču puduri. Tī puduri cytu reizi ari izīt uorā iz dabasu fona, taidi grafiski… Krūni, dobys krūni.”