Ityma nedelī vysā Latvejī  jau dasmytū reizi aizasuoce piļu i muižu apceļuošonys akceja. Sevkuram interesentam tei ir īspieja izzynuot kulturys montuojuma vierteibys, kai jimt daleibu vysaiduos aktivitatēs sešdesmit  pilīs i muižuos, daļa nu kuruom atsarūn taišņi Latgolā. 

Izzynuot, nūviertēt, saglobuot i atjaunuot kulturviesturis montuojumu nu klasicisma, jugendstila i cytu muokslys sovpateibu laika – tei ir golvonuo ideja akcejai, kurā sevkurs interesents aicynuots apceļuot piļs i muižys vysā Latvejā. Vaira par ituos akcejis mierkim viestej tuos organizators i bīdreibys „Latvejis piļu i muižu asociaceja” vaļdis prīšksādātuojs Juoņs Lazdāns.

„Muižu saiminīki var paruodeit, kas pi jūs ir šmuks. Tai tys ir, apceļojam dzymtū zemi. Kotru godu muižuos nūtiek kaidi restauracejis dorbi, koč kas teik atjaunuots, jaunys izstuodis. Muižā vysod ir parks, ysod ir kaids golds ci styureits, kur var pasēdēt.”

Latvejis piļu i muižu asociacejis vadeituojs Juoņs Lazdāns pats Kuldeigys pusē atjaunoj klasicisma laika Paduris muižu. Tei zeimeiga ar cīši daudzi saglobuotom originalom detaļom.

„Jei ir zeimeiga ar tū, ka ite ir vyss originals, vysys durovys, lūgi, kruosne, vysuos ustobuos ir gleznuojumi iz sīnu. Tei ir kai saimis sāta, tei nav īkuortuota kai muzejs. Ir cīši daudzi muižu, kas vēļ gaida sovu gluobieju, atdzeivynuotuoju. Ir muižys kuruos ir dzeivūkli, kulturys nomi, školys, ir taidys, kurys īt pūstā.”

Taišni, kab aktualizātu īspiejis veicynuot piļu i muižu atdzimšonu, apceļuošonys akceja nūteik jau dasmytū reizi. Itūvosor apmaklātuojus uzjimt gotovi sešdesmit muižu saiminīki. Akceju atbolsta ari vēļ cikom mozuok zynomys muižys. Jūs vydā – Austrumlatvejis pīrūbeža perle – Saļnova, kurā jau ūtru godu saiminīkoj i remontu taisa daudzbārnu i apbolvuojumu „Latvejis lapnums” sajāmusī Dzierkaļu saime. Turpynoj Aija i Jezups Dzierkali.

„Mierkis ir vīnkuorši jū savest kuorteibā, kaba byutu pateikamai nūbraukt. Mums jau niu iz iteini pa vosoru brauc cīši daudzi paziņu i draugu, kaba vīnkuorši ite pabyutu.”

Apceļuošonys akcejā vysvaira pīsadola saimis ar bārnim, bet ir ari ekskursantu grupys voi organizacejis. Par pīmāru, retro entuziasti, kas ar senejim automobilim i mocikletim kūpā apbraukoj taišni Latgolys muižys i piļs. Sovpus Latvejis piļu i muižu asociacejis vaļdis prīšksādātuojs Juoņs Lazdāns aicynoj pyrma apmekliejuma viereigi izpieteit viesturiskūs vītu dorbalaiku.

Piļu i muižu apceļuošonys akceja nūsaslēgs septembra golā, da tam, kab varātu dabuot bolvys, akcejis dalinīkim ir juosakroj vysmoz 30 atzeimis par vysaidu aizdevumu izpiļdeišonu. Vaira informacejis dazynuošonai vītnē http://pilis.lv, kai ari akcejis socialūs teiklu Facebook lopā.