Pīgrīžūt viereibys sabīdreibys raksteit prasšonai latgalīšu rokstu volūdā, jau pīktū reizi nūteik pasauļa diktats latgalīšu rokstu volūdā. Itūgod diktatā aktrise Inga Misāne-Grasberga skaita fragmentu nu Ilzis Spergys vēļ napublicāta stuosta “Seiki kūceni zīdēja”.

Diktatu vari nūsaklausēt ituos nedeļis raidejumā voi nūzavērt ite, bet pīraksteitū tekstu puorbaudēt ite:

Siedieju iz gultys molys i vierūs pa lūgu. Preteimā beja lels kuorms. Kod saule speidēja augši pušdīņu laikā, juo lūgi izavēre caurspeideigi. Kod pasagrīze, otkon kai malni caurumi, kai tukšu kubiku rynda. Iz jumta nazkaids kūceņš. Ilgi jau naaugs. Latvejā iz jumtu auga bierzeni. Es nazynu, kas itys taids. Palāku zoru golūs lapenis.

Bārzu putekšni pavasarūs pluovuoja pa paļtim kai dzaltoni tauki ar kriejumu aizdareitā galis zupā, bārzu putekšni beja iz lūgu ramu, iz styklu, iz mašynu.

Veirs maņ saceja: “Nu nav tolka pavasarī mozguot lūgus, cikom nav nūzīdiejuši bārzi i prīdis, a tu naklausi!” Es naklauseju. Mozguoju nazcik reižu, cikom bārni beja mozi. Kod bārni beja leli, sauču paleigā, sasasirdeju, ka naskrīn. Tik tei to beja muna bāda, ka stykli nateiri. Jim namaiseja. Kod poša beju pavysam jauna, ari namozguoju, beja gona ar sevi. Es gribieju byut loba mama.

Teksts sastateits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus, kuri daeinami ite - likumi.lv.

Diktatā pīļaunama divskaņa “uo” apzeimuošona ari ar “ō”.