Aicynojam sevkuru latgalīšu volūdys draugu i entuziastu pīraksteit diktatu latgalīšu rokstu volūdā. Ar mierki aktualizēt latgalīšu volūdys lītuojumu i pīvērst sabīdreibys uzmaneibu raksteitprasmei latgaliski, itūgod kūpā ar Latgalīšu kulturys ziņu portalu lakuga.lv pasauļa diktats latgalīšu rokstu volūdā teik organizeits jau trešū reizi.

Diktatu raidejumā “Kolnasāta” klausīs jau itū sastdiņ, 2019. goda 9. novembrī plkst.18.15, bet pīraksteitū tekstu puorbaudi portalā lakuga.lv ci vari tū īsyuteit eipašā tīšsaitis sistemā i sajimt atbiļdi e-postā jau ar klaidu lobuojumim.

Itūgod diktatam izraudzeits fragments nu Egitys Kancānis stuostu gruomotys “Syltuo mola”, tū skaiteis muzikis, grupys “Baritoni” dalinīks Mārtiņš Strods.

Diktata teksts sagataveits, īvārojūt 2007.godā apstyprynuotūs “Latgalīšu pareizraksteibys nūscejumus”.

Oktobra golā  Mārtiņš Strods gasteja Nautrānu vydsškolā i Baļtinovys vydsškolā, pīduovojūt īspieju vydsškolānim pīraksteit diktatu kluotīnē.

“Diktatu latgaliski raksteju pyrmūreizi. Tei beja jauna pīredze, kas dūmoju dzeivē nūderēs,” ar sovu pīredzi doluos škoļneica Anna. Sovpus Oskars latgaliski raksteit vuicejīs, pārnejā godā gatavejūtīs latgalīšu volūdys olimpiadei: “Diktats lykuos dīzgon vīglys, bet, gon jau puorbaudūt, klaidys byus, jo nav jau īrosts raksteit latgaliski, vairuok tikai runuot.”

Raidejuma “Kolnasāta” vadeituojs Ēriks Zeps, aicynojūt raksteit diktatu, soka: “Navajag uzatraukt par sovom rokstu volūdys zynuošonom. Saprūtama līta, ka daudzim nu mums, ari maņ, tuos nav speidūšys, jo nav bejuse vareiba latgalīšu volūdu vuiceitīs školā. Diktata raksteišona vaira ir kai pīdzeivuojums i ari aplīcynuojums latgalīšu volūdys eksistencei, pīruodejums tam, ka latgalīšu rokstu volūda ir tikpat skaneiga i vierteiga kai latvīšu literaruo volūda.”

Īplanavoj laiku i raksteisim diktatu latgalīšu volūdā kūpā!