Apreļa gols Rēzeknis pusē vysod saistuos ar keramiku i Latgolys pūdnīku dīnom, kur var redzēt, sajust i svinēt Latgolys muolu, kas ir ari daļa nu Latvejis Kulturys kanona. Ik pa godam omotu meistaru vaicojam ci jī redz, ka itam vysam ir ataudze i jaunīši izavielej itū omotu. Juopīzeist, ka cīši populars keramika omots jaunīšu vydā nav, vystik pa kaidam jaunam meistaram pa šaļtenai pasaruoda. Vīns nu taidu īprīcynūšu pādejuo laika keramiku puļcena paplašynuojumu Latgolā nūteikti ir “Pīterkolns” Rēzeknis nūvoda Ūzulainis pogostā. Tuo — saiminīki Imants i Dace Losāni.