Itūreiz raidejumā klausīs sarunu ar jaunū i ambiciozu povuoru Māri Astiču, kurš kasdīnā jau padsmit godu dzeivoj i struodoj Reigā. Koč ari Māris īt nu kulturviesturiskuos Sēlejis nūvoda teretorejis – Dvītis pogosta, jis pats sevi vysod lapnai sauc par eistynu latgalīti. Niu Māris ir gon vīns nu šefpovoru restoranā „FERMA”, gon ari povuoru školys vadeituojs.

„Braucīņs iz Latgolu i iteinis garšu vaicuošona taidam izteiktam piļsietnīkam ir pat leluoks pīdzeivuojums nikai mums bierneibā beja braukt iz Reigu.”

Povuors Māris Astičs, kurš ādynuošonys biznesā dorbojās jau treispadsmit godu, izsver, ka mums ir juosalapoj ar tū, kas viesturiski ir myusu, kai ari ar iedīnim, kurus varim poši sagataveit nu vītejūs produktu. Te gon jis pīzeimej, ka reizem ļauds, vaicojūt i stuostūt cytim par sova viesturiskuo nūvoda garšom, pīmierst par svareigom lītom.

„Varbyut cytu reizi tys cylvāks drupeit aizpald paceli ar tū sova nūvoda garšu, jo mes savadam cīši daudzi vysaidu produktu, par pīmāru, atvadam vystu nu Pūlejis, izkapcejam tū i sokam, ka tys ir myusu nūvoda kapciejums, garša. Es saceitu, ka tai vys nav. Ir vys tik drupeit juopasaver ari viesturē. Taitod, pyrma Pasauļa karu Latvejā beja cīši spieceiga kulinareja, ir ari vairuokys spieceigys senejuos gruomotys. Ari Reigys ūsta beja vīna nu TOP ūstu. Pec karim asam pajāmuši drupeit cytu vaļstu, cytu tautu nacionalūs iedīņus i niule sataisejuši mums saprūtamuok. Ka veramīs viesturē, tod mes atrūnam eistyn lobus, unikalus iedīņus, kurus vajadzātu drupeit vīnkuoršuot, atvīgluot, jo cylvāks vaira nav rads pi tik smagneja iedīņa, tik suotna ci trakna. Taitod padareit drupeit myusdīneigus.

I vyssvareiguokais ir izavēlēt myusu pošu vītejūs produktus. Es pat saceitu – sovvalis produktus. Azari, meži, doba – tys ir tys, kas mums ir i ar kū mums ir juosalapoj.”

Pi Latgolys garšu Māris pīsauc buļbešnīkus, ašņa dasys, buļbu blīnus, sātys sīru, kapciejumus, špeku i cytus gordanumus.

„Izvysa ekskluzivuokuo zivs ir zuts. Daudzi soka, ka tei ir Latgolys zivs, bet nu jim jau niu Latvejā ir līgums i giut eisti nadreikst, deļ tuo tūs niu rauga audzēt.”

Māris stuosta, ka jis pats gatavejūt rauga vaira izmontuot vītejūs produktus i ari cytus aicynoj dariet taipat, jo taišni tys ir tys vierteigais, kas mums ir i ar kū mes varim puorsteigt ari cytus – gon puornūvodnīkus, gon uorzemu gostus.

„Sevkura produkta garša ir atkareiga nu tuo, kur jis ir dzeivuojs, kur audzs i kaidūs apstuokļūs. Glīmiežam, zivei, tomatam – jebkam.”

Māris pīmiņ kai pyrma puora godu piec žurnalistu lyuguma, jis jūs veds turā iz Latgolu, izbaudeit iteinis garšys.

„Tūs Reigys gostus es beju pateikami puorsteidzs, jo jī gols golā saceja, nu kai var byut tik vismīleigi i sirsneigi cylvāki uzjamūt pilneigi svešus ļauds. I ite vysa tycamuok ir ari tei muna izceļsme, latgalīšu, Sēlejis ašnis, ka juobyut vīsmīleigam. Kod pi mane brauc gosti, es ari kluoju goldu i sagaidu jūs i tys pats ir vysur Latgolā, ka tevi sagaida. I es saceitu, ka leidz ar tū maņ Latgolys garša asociejas ni ar kaidu konkretu iedīni, bet taišni ar tū vīsmīleibu. Tys nav pīnuokums, tys vīnkuorši ir ašnī – gribiešona sagaideit i uzjimt gostus. Te ir tys atslāgs, ka latgalīts vysod atsaškiers ar sovu vīsmīleibu... Pošu veiduotais, pošu gataveitais, pošu īvuoktais i vysa tei zīmys lobumu saguoduošona, tys ari munā skatejumā ir tai izteiktuok taišni Latgolā.”

Vaicuots par šmakovkys vītu golda kluojumā, Māris pīzeist, ka myusdīnuos ari tei varbyut vierteiba.

„Itūšaļt ir cīši daudzu vysaidi mozī ražuotuoji, naleli uzjāmumi, kas ir sakuortojuši liceņcis i gatavej šmakovku, spiej tierguot i ari pīguoduot restoranim. Es saceitu, ka, sagaidūt ari uorzemu gostus restoranā, tev ir īspieja, stuosts i īdūt pagaršuot, tod tys par reizi var īdūt taidu pīvīnuotū vierteibu, ka tev Latvejā ir lobs i kvalitativs pošu bryuvāts dzierīņs... Es saceitu, ka ar tū ir juosalapoj i tys ir juoceļ goldā, par tū ir juostuosta, bet, saprūtams, saglobojūt kvalitatis zeimi.”

***

Šudiņ sovu pyrmizruodi pīdzeivoj režisora Viestura Kairiša kina „Piļsāta pi upis”, kas ir ūtrei profesionaluo muokslys kina latgalīšu volūdā. Par tū, ar kaidom sajiutom itū kinu sagaida tuos akteri i rodūšuo komanda, klausīs Silvijas Smagaris sižetā. Tymā drupeit ari par fiļmeišonys procesu i akteru izaicynojumim.

***

Ituos dīnys viesturis rubrikā Kaspars Strods mums pastuosteis par Latgolai i Latvejai tik cīši svareigim nūtykumim pyrma symta godu – Latgolys atbreivuošonys ceiņom.