Prīsters Māris Laureckis jau vaira nikai vīnpadsmit godu dzeivoj Rēzeknis nūvoda Drycanu pogostā i ir Drycanu i Piļcinis draudžu pravests.  Ūtruo adventa svātdīnis prīškvokorā ar sovā vīnkuoršeibā i atvierteibā harizmatiskū prīsteri ruonuosim par advena laiku, gavieni myusdīnu izpratnē, distanceišonuos laika pļusim i minusim, Zīmyssvātkim, mozūs bazneicu uztureišonys izaicynojumim i cytom aktualom temom. 

"Myusu dīnuos cylvāki nasaprūt atsasaceišonys jiedzīni. Vysur cylvākus vuica - izbaudi, paraugi, pajem, nūpierc, steidzīs, atlaidis, akcejis. Cylvāka dūmuošona niu ir taida, ka vajag īspēt tū vysu nūpierkt, atrast tū lobuokū i lātuokū

... Atsasaceit tei ir loba i svieteiga līta. Bazneica vysod ir aicynuojuse tū dareit.Atsasaceit nu lobys lītys kaida augstuoka mierka deļ. Par pīmāru, kaba muns pruots nūsamīrynuotu. Cik mīreigi es naktīs guļu. "

Pravest pīzeist, ka svātūs rokstu skaiteišona vysūs laikūs ir paleidzejuse mums puorvareit gryuteibys i ik pa laikam, sevkuram cylvākam, tūs ir svieteigi puorskaiteit.

"Losūt svātūs rokstus, cylvāks nūsamīrynoj. Jis redz ari tuos bādys, kas beja īprīškejom paaudzem. Pesteišonys viesturi, kai guoja Izraela tautai, kai ari jī guoja cauri vysom slimeibom, epidemejom, karim, okupacejom i tai tuoļuok. I jī izguoja, ar Dīva paleigu. Dīva vuord styprynoj. Dīva vuords myusu pruotus i sirdsapziņu, kai Svātī roksti stuosta, kai divasmiņu zūbyns – caurdūr. I tod izplyust patīseiba, kas tī myusūs īškā ir. Ryugtums, napateiceiba voi ari ūtraižuok – vīnkuoršeiba, pateiceiba, mīlesteiba. Atsakluoj siržu dziļumi. Kod draugu īpazeistom? Bāduos. Tai ari poši sevi mes īpazeistam tuksnesī."