Itūreiz raidejumā “Kolnasātā” braucam iz Viļānūs asūšū Viļānu Sv. Erceņgeļa Mikeļa Rūmys katuoļu bazneicu, kur Ēriks Zeps sasateik ar pravestu Rinaldu Stankēviču aba tāvu Benediktu. Runojam par pandemeju i dzeivi tymā, kai ari Vyssvātuokuos Jaunovys Marejis dabasūs uzjimšonys svātkim Aglyunā.

"Itūgod tei situaceja ir taida, ka dūdūtīs iz Aglyunys svātkim ir vajadzeigys īejis kartis, iz kurom, patīseibā, mums juosaver cīši, cīši pozitivi. Deļ kam? Nu, īsadūmojit situaceju, ka īejis karšu nav i pi Aglyunys bazneicys vuortu atsarūn Vaļsts policeja, Zemissardze i skaita cylvākus. Breidī, kod sakaralajā laukumā vīnlaiceigi atsarūn jau treis tyukstūšys cylvāku, bazylikys vuortus aiztaisa cīši... Itei izeja nu situacejis ar īejis kartem ir cīši loba, jo, ja cylvāki gatavejās braukt iz Aglyunu i dasadaleit svātkūs, jis aizīt iz sovys draudzis bazneicu i pajem itū īejis karti, kura jam nūdrūsynoj vītu Aglyunys svātkūs kluotīnē... Cylvāki iz Aglyunu ir svātceļuojuši vysmoz pādejūs treis symtus godu, pi Aglyunys Dīvmuotis svātbiļdis i nikaidys situacejis vaļstī ci pasaulī cylvākus nu tuo nav atturejušys. Mes tok pīminim Padūmu laikus, kod tyka dareits vyss, lai cylvāki 14. i 15. augustā nadasadaleitu svātkūs. Tyka puorbaudeitys mašynys, miliceja tūlaik puorbaudeja, tyka vaicuoti vysaidi īmesli, tyka slāgti celi. Kū dareja cylvāki? Cylvāki ar ritinim i zyrga pajiugim pa mozim lauku celenim brauce, bryda puori strautenim, lai tykai tyktu iz Aglyunys svātkim. Taitod patīseibā myusu tautys viesturē Aglyuna ījem cīši vārā jemamu vītu gareiguos izaugsmis ceļā. I ari itys gods taidā ziņā nav izjāmums."

Prīsters aicynoj cylvākus vērtīs iz itū vysu nu pozitivuos pusis, jo mes tok Aglyunys baziliku varim apmeklēt vysa goda garumā. “Ituo virusa īspaidā cylvāki ir puordūmuojuši sovu aicynojumu, dzeivis mierkus, kamā es salīku sovu cereibu, i voi tys mani spiej gluobt. Vīnnūzeimeigi pasceit voi itys viruss ir lobs, voi slykts navar. Byus lobys lītys, dīvamžāļ, byus ari slyktys lītys, kas nūteik, kaut voi vardarbeiba saimēs, par kū niu Vaļsts policeja breidynoj.

Tei ir cīši sarežgeita līta, kas lelā mārā atkareiga nu cylvāka poša, kai jis izdzeivoj itū laiku, kas jam ir vierteigs, par kū jis turpynoj ryupētīs i kas ir tuos lītys, nu kuo jis itymā laikā atsasoka.”

Prīsters Rinalds Stankevičs izsver, ka vysys bazneicys lyugšonys var īdaleit divejuos leluos kategorejuos. “Vīna ir muna privatuo lyugšona, kas byus rūžukrūņs voi litaneja, reita ci vokora lyugšona. Itei lyugšona ir atkareiga tikai nu mane, kai es sakuortoju laiku, kaba munā dzeivē byutu pīnuoceiga vīta lyugšonai. Cik laika tymuos 24 stuņdēs, kū Dīvs maņ kasdīnā dūd, es veļteju lyugšonai, kura ir vajadzeiga kotram cylvākam. Ūtra lyugšona ir bazneicys lyugšona, kas ir svātuo mise, sakramenti, adoraceja i itū lyugšonu mes varim izbaudeit i smeļtīs spākūs, tikai apmeklejūt bazneicu. Taitod goreiguo dzeive nav organizāta tai, ka, ja es sātā lyudzūs, maņ navajag apmeklēt bazneicu i ūtraiži... Ni škārsteiklys, ni televizeja, ni radeja cylvākam napīduovoj īspieju vyspiļneiguokajā veidā, kaida ir ite iz zemis, vīnuotīs ar kungu Jezu, pījemūt Svātū komuneju...

Tim cylvākim, kurim, dīvamžāļ, itūgod nabyus vareibys dasadaleit svātkūs kluotīnē, bet jī tū dareis attuolynuoti. Tei ir koč kaida izeja, bet tei nikod naspēs piļneibā aizstuot kluotīnis daleibu Vyssvātuokuos Jaunovys Marejis Dabasūs uzjimšonys svineibuos Aglyunā. Kotrā ziņā labi, ka niu ir taida īspieja.”