Piec diveju godu puortraukuma apreļa pādejā nedelā Latgolā otkon nūteik Latgolys pūdnīku dīnys – 41. reizi. Ituo pasuokuma golvonais mierkis jau daudzi godu ir muola meistaru i keramikys meiļuotuoju sasatikšona. Myusdīnuos muocekla i meistara tandems  sastūpams arviņ rešuok, koč ari  nazkod sevkurā amatnīka darbneicā tyka izaudzynuoti vysmoz puora jaunī meistari, nareši nu sovys saimis. Navarātu saceit, ka niu Latgolā ir cīši daudzi jaunūs keramiku ci pūdnīku, bet kotru godu pa kaidam vys tik īt kluotyn. Itūreiz gribim pīduovuot jums sarunu ar kaidu jaunu meistari, pūdneicu Līgu Krasnikovu. Līga ir Kruoslovys pusis keramiku Valda i Olgas Pauliņu meita, kura niu piec studeju Reigā i dorbuošonuos cytuos jūmuos, atsagrīzuse atpakaļ dzymtajā pusē, kaba turpynuotu dzymtys tradicejis pūdnīceibā. Kai pīzeist poša meistare, sovu eistynū rūkrokstu muolā jei vēļ veidoj – asūt vysā daudzi teoretiskūs zynuošonu, kurys rūkom juosavuica.