Kai tev redzīs, cik pīviļceigi, daīmami i gotovi mes asam uorzemu turistu izjimšonai? Itūreiz raidejumā ar Lūznovys muižys puorvaļdneicu Ivetu Balčūni, Rēzeknis Turysma inpormacejis centra (TIC) vadeituoju Jelenu Kijaško i portala Trawelnevs.lv uzturātuoju i vīnu nu zynūšuokūs turysma apskotnīku Latvejā Aivaru Mackeviču, runuosim par puorrūbežu turysmu Latgolā. Perspektivys, potencials i izaicynuojumi.

Lūznovys muižys puorvaļdneica Ivetu Balčūne: „Mes varim atsateisteit tikai sasadorbojūt vīns ar ūtru i nikai cytaiž... Vīns spylgts objekts pats par sevi nastruoduos, te ir juobyut sadarbeibai. Verūtīs ari nu ībraucieja skota punkta, naz voi jis brauks iz Latgolu deļ vīna apskatis objekta, bet ka jam byus vairuoki pīturys punkti, tod ir leluoka varbyuteiba, ka jis vys tik atbrauks.”

Gon Rēzeknis TIC vadeituoja Jelena Kijaško, gon Lūznovys muižys puorvaļdneica Ivetu Balčūne pīzeist, ka turysma sezona rudinī nasabeidz, tei turpynojās vysu godu, mainuos viņ iņteņsitate i atpyutys veidi. Taipat juos pīzeist, ka turistu pīsaisteišonā cīši svareiga ir sadarbeiba storp vysaidim apskatis objektim i uzjiemiejim regionā. Turpynoj Iveta Balčūne. „Tys, ka masu medeji stuosta, ka mes poši stuostom ir vīna līta, bet turysms vyscīšuokajā veidā ir saisteits ari ar tū, voi tī objekti kai magneti teik veiduoti. Ja tai ir, tod ap itim objektim ari veidojās puorejuo plyusma. Pasaruoda uzjiemieji, kuri pīduovoj sovus pakolpuojumus vysaiduos jūmuos. Jī izreiz saredz sovys īspiejis.”

Runojūt par uorzemu turistim Rēzeknē Jelena atkluoj, ka tī pamatā īt nu tyvuokūs sābru vaļstu, vysvaira, nu Krīvejis. Turpynoj Jelena. „Mes asam blokus i tyvai Krīvejai i itymā gadejumā tei myusu lokaceja, munā skatejumā, nav minuss, kai daudzi tur, ka mes asam nūstumti molā, tuoli nu Reigys i mums ite ir gryuši dzeivuot. Tai nav, kai reize, mes pīrūbežu uzskotom kai potencialu. Pyrmajā vītā i turisti nu Krīvejis, tod Pūleja, Vuoceja, Leitova i cyti.”

Iveta Balčūne stuosta par puorrūbežu sadarbeibys pamatvirzīnim Lūznovys muižā.

„Verūtīs iz puorrūbežu projektim, mums ir interese veiduot maršrutys, kab pīvylynuotu blokus asūšūs vaļstu turistus, taišni atrast tūs kūpsauciejus, deļkuo jī byutu īinteresāti pi mums atbraukt. Par pīmāru, ari Rēzeknē ir Kerbedza tylts, kas apgrīzts iz ūtru pusi, ni tai kai parosti pījimts. Tī ir koč kaidi pīturys punkti, kas jim paleidzātu pi mums atbraukt.”

Aivars Mackevičs pīzeist, ka Latgola uorzemu turistim ir interesanta i ite ir daudzi kuo redzēt, vys tik ir ari daudzi kas uzlobojams, kab veicynuotu puorrūbežu turisma atteisteibu. Turpynoj Aivars. „Tys ir taipat kai izkuopt Everestā, tys ceļš iz Latgolu ir cīši gryuts. Tys, ka pi mums ir daudzi kuo redzēt, atsapyust i izzynuot, tys gon, bet vysod ir aktuals vaicuojums par ceļu. Kai, cik dreiži i cik ārtai pi mums var nūbraukt. I tū vysod vajag saleidzynuot ar tū, kai var nūbraukt leidz citim. Cik dreiži i cik lelys izmoksys tam vysam. I te mes redzim, kai tys ir Leitovā, kur jau vaira nikai 400 kilometru garumā ir izbyuvāta autostrade... Ūtra līta ir tei, cik labi mes par sevi pastuostam cytuos volūduos, na tikai latvīšu volūdā Te ir vaicuojums, ka mes pasaveram sātyslopys, gon Latvejis turisma sātyslopys, gon kotra uzjāmuma. Labi, ka mums ir koč kas angliski voi krīviski, bet tys ari vyss. Vaicuojums ari par tū, cik tei inpormaceja ir aktuala i saistūša. Tī ari ir lītys, kas byutu juouzloboj. Trešais, kam es grybātu pīvērst uzmaneibu, ka cīši daudzūs objektūs Latgolā eiroremonts ir taiseits 90. godu beiguos. Te ari daudzi kas byutu juodora.”

Aivars pīzeist, ka uorzemu turistu mes pamatā pīsaistom ar mozom, sirsneigom i personiskom lītom, masveida turysma mums Latvejā nav. Turpynoj Aivars. „Vysod ir tuos mozuos mierķauditorejis, jo pi mums nav koč kuo taida cīši lela, miļzeiga. Mes vysod uzrunojam cylvākus ar taidom mozom lītom, kurys jī gryb redzēt, nu kai ir pi cytu. Par pīvadumu, amatnīceiba, garšeigi i cytaižuok paēst, Aglonys bazilika i tamleidzeigi. Daudzi latgalīši tagad dzeivoj uorpus Latvejis, Anglejā, Irejā i vys koč kur pa pasauli, vaicuojums, cik mes labi jūs izmontojam. Tei interese jau var rastīs, ja tys cylvāks pats par sevi ir interesants, ta pi juo var nūbraukt gostūs...”

Jelena Kijaško uzsver, ka, pozicionejūt Latgolu uorzemu turistim, mums juobyut kūpejam pīduovuojumam.

„Mums juobyut vīnam vasalam, vysu regionu vajag pozicionēt kai vīnu vasalu, cytaiž, mes par tū jau asam puorsalīcynuoši vairuokuos uorzemu izstuodēs, ka absoluti nav jāga braukt iz Vuoceju, Niderlandi voi tū pošu Pūleju i stuosteit jim par vīnu piļsātu ci vīnu objektu. Dīvamžāļ mums nav taidu pasauļa objektu iz kurim vīnim pošim brauktu turisti. Sadarbeiba ir pyrmajā planā i mums kai TIC tys ir pamataizdavums – veicynuot sadarbeibu.”

 
 
 

***

Sovpus sižetā Guna Igavena stuosteis par bīdreibys „Hronologeja” oktobra golā izdūtū gruomotu „Sīvīte”, kas ir jaunuos latgalīšu literatis Ligijis Purinašys pyrmais dzejis kruojums. Tymā viesture i stypru sīvīšu kasdīna cauri laikim i paaudzem harmoniski sasavej 80 tekstūs, kas topuši pādejūs sešu godu laikā. Stuosta poša autore. „Dzejis kruojums ir par i ap sīvītis aktualom lītom, emocejom, jiutom, koč kaidim nūtykumim, kas myus vysus ītekmej. Tys ir ari par tū pīredzi, kas mums kotrai īt leidza, kurai tei ir pozitivuoka, kurai negativuoka. Te ir ari munys koč kaidys dzeivis fiksacejis, nūtykumi, kurus es asu vīnkuorši redzejuse nu molys... Ite, prūtams, ir tei privatuo, personiskuo pīredze, bet es nasoku, ka tys ir vīns pret vīns, saprūtams, ka tys ir atškaideits ar koč kaidim nūvāruojumim, izteiksmis leidzeklim. Nui, vīns nu tūs uzsvoru ir taids, ka es asu ari muna mama, baba, probaba i es asu juos vysys koč kaidā breidī. Tys laika ritejums, jis īt cauri.”