Latgolyys kongresa dīnā, 27. aprelī, savu pyrmizruodi škārsteiklā piedzeivuoja latgalīšu dokumentaluo kina “Laiki. Cylvāki. Volūda”, kas stuosta par ceņtīnim saglobuot latgalīšu volūdu i kulturu cauri laikim, par speiti politiskūs varu lāmumim i pretdarbeibai. Kina velteita izcylajam latgalīšu literatam i īvāruojamuokajam Latgolys rūkroksta gruomotnīceibys puorstuovam Andryvam Jūrdžam, kuram itymā godā atzeimejam 175 godu jubileju.

Kinys režisors i producents ir Arņs Slobožanins, sovpus idejis autors i leidzproducents ir ASV dzeivojūšais latgalīts, mecenats Pīters Aloizs Ragaušs. Pi video, skanis i montažys struoduoja Ivars Utināns. Taipat kinā dzierdami ari vairuoku viesturnīku i volūdnīku – Henriha Soma, Valentina Lukaševiča, Lidijis Leikumys i Valtera Ščerbinska – komentari.