Vaļuka dīnys prīškvokorā pīduovojam jums nūsaklauseit fragmentu nu jaunuo latgalīšu literaturai veļteituo raidīroksta „Puslopys”, kurā muzikis i viesturnīks Arņs Slobožanins kūpā ar latgaliskūs projektu vierzeituoju Edeiti Husari sasarunoj ar Latgolā pazeistamuokū Valentinu – rakstnīku i literaturzynuotnīku Valentinu Lukaševiču. Naseņ jam izguoja ari jauns dzejūlu kruojums – „Pādi navā svāti”.


„Maņ dzejūļūs ir taida sovpateiba, es ļūbeju izmontuot homoformys, kur vīnam vuordam ir vairuokys nūzeimis. Pādi – tī ir gon smiļktī, gon zečē… I storp jim ir cīši lela starpeiba.”

Taipat Valentins Lukaševičs atkluoj, ka jam napateik, kod cylvāki apgryutynoj ar līku i navajadzeigu saturu. Jū i cyts cytu.

„Maņ besej taidi cylvāki, kuri mani nacīnej. Minimalū filtru, minimalū selekceju, pat runā i vysā puorejā, izdori pats. Apleik ir cīšī daudzi informativuo musara. Miļzeigs informativais musars, kas mani apgryutynoj, maņ nu juo suop golva. Es nu ituo aizbāgu. Par tū es jau tagad daudzus godus dzeivoju klusumā.”