Par reemigraceju pādejūs godūs runuots daudz, i nu jau gondreiž godu Latvejā izveiduots ari eipašs reemigracejis koordinatoru teikls. Par Latgolys reemigracejis "krystamuoti" īsauktuo Astrīda Leščinska ir vīna nu pīcim koordinatorim i kasdīnā dorbojās Daugpiļi. Jei rauga iz Latgolu atgrīzt sovus tautīšus nu uorvalstim i ir ari panuokumi. Bet kaids ir juos pošas stuosts, tū iz reģionaluo reemigracejis koordinatora biroju guoja nūskaidruot Gunta Ločmele.

Sovpus Laura Melne Reigā sasatika ar folkloristi i Zīdūņa muzeja pietneicu Rūtu Šmiti i antropologi, fotografi Elīnu Kursīti, kam topuse gruomota “Latgales pēdējie mohikāņi”, kas ir kai turpynuojums pyrms diveju godu izguojušajai gruomotai “Latvijas pierobežas pēdējie mohikāņi”.

Gruomota topuse vairuoku ekspediceju rezultatā, i stuosta par Latgolys mozcīmu īdzeivuotuojim. Gruomotu veidoj 52 stuosti, kurus papyldynoj vizuali boguoteigys fotografejis. Gruomotys attaiseišonys svātki nūtiks 13. decembrī.

Bet rakstnīks i literaturzynuotnīks Valentins Lukaševičs i muzikis Arņs Slobožanins rubrikā “Vuordineica” runoj par lizeikom.