Viesturis rubrikā itūreiz viesturnīks Kaspars Strods mums pastuosteis par Rēzeknis karantinu, kas beja vīns nu biegļu atsagrīzšonys centru. Aizvadeituo godu symta 20. godu suokumā militarūs konfliktu, Pyrmuo pasauļa kara i Pylsūņū kara rezultatā Padūmu Krīvejā vaļdeja vysai smogi epidemeologiskī apstuokli, kuri draudēja izraiseit jaunu infekceju slimeibu, taidu kai tīfs, dizentereja i cytys, uzlīsmuojumu ni tikai Latvejā, bet ari daudzuos cytuos Eiropys vaļstīs. Situacejis rysynuošonai tūlaik tyka izveiduotys specialys biegļu karantinys, vīna nu taidu nazkod atsaroda ari Latgolā, Rēzeknē. Laika gaitā tei klive par vīnu nu svareiguokūs epidemiologiskuo atbolsta punktu vysā Latvejā. Itū i daudzus cytus stuostus par 20. godu symta Latgolys viesturi, cylvākim i nūtykumim vaicoj ari gruomotā  “Laikmeta nospiedumi: 20. gadsimta Latgales stāsti”.