Šudiņ mes asam nubraukuši iz kaidu muokslinīcisku vītu, kur zeimoj, veidoj i muokslu vysaiž izzynoj i roda kai mozi, tai leli – asam sātā, kurā atsarūn bārnu muokslys škola, Rēzeknis Muokslys i dizaina vydsškola i Latvejis Muokslys akademejis Latgolys filiale. Izstaiguosim, apsavērsim i sarunuos ar pedagogim raudzeisim dazynuot, kas tod ite nūteik i kū interesenti ite vuicuos.

Rēzeknis Muokslys i dizaina vydsškolys direktore Ilma Šteinberga, kura itymā omotā struodoj jau pusgodu, redzīs vysā entuziastiski nūskaņuota iz tū, kab škola pīdzeivuotu saturiskys i vizualys puormainis. Pīsaceitu sevi kai vārā jamamu izstuožu i muokslys pleneru vītu na viņ regiona i vaļsts, bet ari storptautyskā leiminī.

Ākys pogrobstuovā omuleigi īsakuortuojuse i dzeivoj Tielnīceibys izgleiteibys programa, kuru pyrma sešu godu izveiduoja i voda ari niu Gunārs Klaučs.

Restauracejis i Kūka izstruoduojumu dizaina izgleiteibys programys vadeituojs Andris Anspoks izruoda sovys darbneicys i stuosta par tū, kū jaunīši ite vuicuos.

Natuoli nu školys atsarūn vaļsts nūzeimis kūka arhitekturys pīmineklis i vīna nu šmukuokūs kūka sātu Rēzeknē, Rēzeknis Muoklsys i dizaina vydsškolys Muokslys noms, kurā dorbojās metalmuokslinīki. Ite sateikam metalapstruodis meistaru i tielnīku Norbertu Kudiņu, kurš jau vaira nakai 25 godus vuica jaunīšus i doluos sovā profesionalajā pīredzē.