Itūreiz pi mums gostūs Latgolā vīneiguo gitaru muzeja veiduotuojs i saiminīks, Rēzeknis nūvoda Kaunatys pogosta dzeivojūaisī Juoņs Kuzminskis kūpā ar sīvu Aiju. Dīmavžāļ aizvadeituo goda golā jūs vaira nikai septeņu godu garumā veiduotais gitāru muzejs gondreiž pļlneibā aizguoja pūsta guņsnalaimē. Niu aktivi teik atjaunuota darbineica, lai jau iz pavasari ite otkon varātum tapt jaunys gitarys. Ar laiku, saprūtams, teik planavuots atjaunuot ari muzeju. Aija i Juoņs gon pīzeist, ka jau tagad ir skaidrys, jaunuos ākys byus cytaižuokys, gon izmāra, gon satura ziņā.


 „Škiram jaunu puslopu, vaicojam piec jaunys pīejis. Koč kas ite byus, varbyut ar cytaižuoku skatejumu.”


Juoņs ar Aija kūpa audzynoj četrus bārnus i muzicej grupā „Gandreiž 10nīkā”. Aija kasdīnā ir pasnīdzieja Rēzeknis Tehnologeju akademejā, sovpus Juoņs kasdīnā pamatā struodoj pa sātu, kai ari pi jaunu muzykys instrumentu radeišonys, niu gon dorba dīnys teik aizvadeitys jaunuos gitaru darbineicys byuvnīceibā.


„Pats pyrmais, kas byus cytaižuoks, vysmoz niu jau ir skaidrys, ka jaunuo darbineica byus pīcys reizis mozuoka nikai vacuo. Kū jau mes niu varim atsaļaut sataiseit. Ar gitaru izgataveišonu es nūsadorboju jau vysmoz divdesmit godu. Vacū darbineicu mes cēlem nu 2013. goda i tai i naīspiejom piļneibā pabeigt. Itei mozuo niu tūp kai pagaidu variants, saprūtams, teik planavuots, ka ar laiku jai byus pībyuvis. Gribim tai, lai nav otkon septeni godi juobyuvej, bet lai jau pavasarī varatūm ite dorbuotīs. Itūnedeļ  atbrauce jumts, āka ir apšyuta nu uorpusis. Palyka niu tikai sagaidiet drupeit syltuoka laika i varēs likt jumtu viersā.”

***

Vuordineicā literate Ilze Sperga i viesturnīks Arņs Slobožanins stuosteis par vacvuordu, kas patīseibā latgalīšu sarunvolūdā ir gona dzeivs ari šudiņ – kuorms.


***
Pyrmajā žurnalistis Marutys Latkovskys sagataveitajā rubrikā „Zemis suoļs” jei mums stuosteis par latgaliski saraksteitim lelim literarim dorbim i tūs autorim. Jei izsver, ka taidu lelu literaru dorbu, kai pīmāram, romanu, asameiba latgaliski ir  aplīcynuojums volūdys patstuoveibai. Maruta ir paskaitejuse, ka latgalīšim kūpā ar trymdys autorim ir deveni romani. Ituos dīnys rubrikā par kaidu Latgolys viesturē svareigu persioneibu – Juoni Turkupuli.


„Jis ir Latvejis Republikys armejis breiveibys ceiņu dižkarievs, vīns nu pyrmūs latgalīšu ar augstuokū filologiskū izgleiteibu, žurnala „Zīdūņs”, „Latgolys Škola”, avīzis „Zemis Bolss” izdeviejs, losamuos gruomotys deļ školys bārnu „Dzimtine” veiduotuojs i sastateituojs, Ludzys gimnazejis direktors. Sovūs rokstūs periodikā jis ir pasarakstejs ari ar pseidonimu Sutris.”


Taipat Maruta syuta ari syltus sveicīņus aizvadeituo goda gola opolu jubileju nūsvetiejušajai literaturzynuotneicai Ilonai Salcevičai, kura latgalīšu literaturys lauceņā ari ir struodojuse kai taids darbeigs ryukeits.


„Jei ir bejuse aktiva autore enciklopediskajūs izdavumūs, sagatavejuse ap 140 škierklu par Latgolys literatim, 2005. godā izdūta juos apcere par vasalu godu symtu latgalīšu prozā i lugu rakstnīceibā. Sovukuort 2012. godā ir izguojuse juos gruomota par kinys „Cylvāka bārns” autoru, rakstnīku Juoni Klīdzēju. Jei ir publiciejusēs ari myusu, Latgolys, periodikā – „Tāvu zemes kalenderā”, „Katōļu Dzeivē”, „Olūtā”. Ilona ir dzymuse i izauguse Reigā, saimē, kur tāva i muotis volūda beja latgalīšū. Byudama vieļ pavysam seika meitine, sovus vīnaudžus, Zaubis īlys bārnus, Reigā jei beja savuicejuse runuot latgaliski. Na viņ latvīšūs, bet ari sovus mozūs krīvu draugus. Bierneibā vyss ir īspiejams, ari volūdys prasmis ir mudruok sasnīdzamys.”