Rogovkā nūtyka nūmetne pusaudžim „Sūpluok saimē”

„Sūpluok saimē” ir vosorys nūmetne, kas itymā nedeļā, laikā nu 2. leidz 7. augustam, nūtyka Rēzeknis nūvoda Rogovkā. Tymā kūpā beja saguojuši pusaudži nu vysys Latvejis, kurim tyvs latgaliskais – teksti, dejis, muzyka,  kulturys i viesturis vierteibys. Iz kaidu strēči jim beja pīsavīnuojuse ari Ausma Sprukte.

Plemineicys i pleminīki, muoseicys, muosiniškys i muosys, kai ari unuki i unučkys – taidi nūsaukumi īdūti kotrai nu pusaudžu grupu, kas itymā nedeļā Rogovkā pīsadola nūmetnē „Sūpluok saimē”. Pusaudži vacumā nu desmit da 14 godu Nautrānu vydsškolā i tuos apleicīnē dzīd, īt daņčūs i rūtaļuos, roksta, veidoj rūkdorbus, gon ari vuicuos vysaidys cytys Latgolai i myusu dīnu jaunuotnei aktualys prasmis.

Nūmetne „Sūpluok” nūteik jau ūtrū reizi, tuos ituo goda vadmotivs „saime” izvālāts pandemejis apstuokļu īspaidā, kod vīna nu spieceiguokūs vierteibu, kas nasamaina, ir tys, ka pasauļaunam iz sovu saimi, tyvuokajim – iz sovejim. Vaira nikai 30 daleibnīku vydā ir pusaudži gon nu Rēzeknis i Preiļu pusis, gon ari attuoluoki gosti nu Reigys, Limbažu i cytu Latvejis piļsātu.