Ar scenografu i breivmuokslinīku Ivaru Noviku sasateikam Rēzeknis nūvoda Čornajis pogostā, kur jis ar sīvu Danutu Rāznys azara tyvumā atjaunoj lauku sātu i īkūp apleicīni. Jī atkluoj, ka itūgod byus jau trešuo vosora, kura teik pavadeita ite. Ite vys juopīzeimej, kaba sāta bytu gotova apdzeivuošonai, vēļ daudzi doramuo. Pi atvārtūs i harizmatiskūs saiminīku kaidā nu dorbadīnu vokoru beja nūbraukuse Guna Igavena.

Ivars ir interesants sarunu bīdrys, kurš lobpruot doluos ar pīdzeivuotū i puordūmom par dzeivi teatrī i teatrī dzeivē. Jis sovulaik pabeidzs Rēzeknis Muokslys i dizaina vydsškolu, tuoļuok celi nūvaduši iz Reigu, tī dabuots ari magistra grāds Latvejis Kulturys akademejā. Sovpus pyrmsuokumi teatra muokslys pasaulī jam aizasaukuši ar dorbuošonūs Rēzeknis Tautys teatrī, kuru tūlaik suoce vadeit režisore Māra Zalaiskalns.

Nūbraucūt iz Reigu, Ivars suoce struoduot Latvejis PSR Vaļsts Jaunuotnis teatrī (nu 1991. goda Latvejis Jaunuotnis teatris, piec reorganizacejis 1992. godā itamuos telpuos darbeibu aizsuoce Jaunais Reigys teatris), kai ari paraleli sasadorbuoja ar puorejim teatrim Latvejā i uorpus tuos rūbežu, kur veiduoja scenografejis naskaitamom izruodem i pasuocīnim. Ivars struoduojs pi  Bronislavys Martuževys dzejis kliets īkuortuošonys, ir autors ari 2020. godā atkluotajai tārauda spīgeļviersu „Slēptuvei”, puora reižu veiduojs scenografeju Latgalīšu kulturys goda bolvai „Boņuks” i darejs daudzi kuo cyta.