Zīmys saulgrīžūs raidejuma „Kolnasāta” rodūšuo komanda aicynoj tevi iz Kuorsovys nūvoda Saļņovys pogostu. Sarunā itūreiz pīsadola vysaidu profeseju i vacumu vītejī ļauds - Saļņovys tautys noma vadeituoja Valentina Kirsanova, tautys muzykante, folklorys ansambļa vadeituoja i školuotuoja Elvīra Bleive, tautys muzykante Aija Jurāne, tautys muzykants, struodoj vītejā školā Aivars Zeiļuks, bīdreibys „Kūzuls” dybynuotuoja i vadeituoja, vīna nu tematiskuo cīma „Muzykantu cīms” dybynuotuojom, čaju vuocieja i amaterteatra lugu autore Anna Danča, vītejuo bibliotekare jau nu 1976. goda Veronika Zelča, kura iz iteini atbraukuse nu Baļtinovys pusis, suokumškolys školuotuoja, kulinaruo montuojuma saglobuotuoja Ilona Čoiča, vītejuo īdzeivuotuoja Ligita Valijeva.


„Dīva dūta skaista vīta,ar sovim kolnim, lejom i skaistim skotim. Mes varim byut lapni... Ite ir cīši jauka vīta, kab pavadeitu skaistys vacumdīnys,” tai par Saļņovu soka Elvīra Bleive.

Sovpus Valentina Kirsanova par suprātku tradiceju itimā pusē soka tai, „pi mums vaira ir večerinkys. Suprātkys vaira asociejas ar vysaidim rūkdorbim.Lai gon pi mums, prūtams, ir ari čaklys rūkdarbneicys.”

Vītejuo školuotuoja Elvīra Bleive: „Varbyut, ka sapyni pīsapiļdeis i ari Saļņovā byus kočkaida moza muzeja kruotuveite, kur mes ari saglobuosim vītejūs rūkdarbneicu i omotu meistaru dorbus. Palīkam vacuoki i daudzi nu mums aizīt, bet jūs dorbi ir vierteigi i pamuocūši.”

Anna Danča: „Tepoš apleicīnē var īvuokt aptyvai 40 vysaidu čaju, kurus kotrs pats varātum sev zīmai sagataveit, bez lelys pīpyulis.”

Ligita Valijeva: „Asu lapna, ka munys saknis īt nu Ludzys pusis. Latgaliskuo deveiba. Vīnolga, kur mes asam – Reigā, Ludzā voi Moskovā, mes asam latgalīši. Es asu lapna par tū, ka es asu latgalīte. Tikai, ka suocu ruot latgaliski, vysi smaida.”

Tematiskais „Muzykantu cīms” Saļņovā tope Latgolys planavuošonys regiona puorrūbežu projektā, pasaskūt vītejuos dzeivuotuojis Annys Dančys iniciativai. „Ar kū mes asam boguoti? Mums ir breineigi i talanteigi cylvāki, kurus varātum apvīnuot vīnā kūpā i radeit kūpeigu pīduovuojumu turistim. Tymā pīsadola vītejī amatnīki, meistari, tei ir taida nalela kūpa, kas pīduovoj pagaršuot vītejūs produktus i iedīņus. Tai teik atteisteita ari amatnīceiba i muojražuošona. Koč kai tei vītejuo ekonomika pamozam juokustynoj iz prīšku.”

Vaicuoti par tū, cik daudzi tod Saļņovā ir muzykantu, Elvīra Bleiva pīzeist, ka nivīns jau nav skaitejs, bet asūt gona daudzi. Elvīrai gon ir savuokts albums ar vacūs tautys myzykantu bildem, cik nu varēja atrast. „Nu bierneibys pīminu, ka mums vysūs koktūs ite skanēja muzyka. Es asu izauguse taidā vidē, kur varēja vērtīs, kai cyti spieļoj, taidu, kas pamuoca, sovulaik nabeja. Muocejuos vīns nu ūtra. Piec dzierdis. Mes dzeivojam blokus dzeļža ceļam, pa kuru viļcīns īt iz Piteri (Sanktpīterburgu), leidz ar tū daudzi veiri tī struoduoja. Tai braukojūt, jī vysod atvede pa kaidai garmanei, sīvom pa skaistam lokotam. Tai mums vysuos sātuos beja vysaidys garmanis, nu i vysispieļuoja, kai nu prota.”