Piec kaida garuoka laika „Kolnasātys” rodūšuo komanda beja otkon nūbraukuse iz suprātkom aba vakariešonu, kab kluotīnē sasatyktu ar vītejim īdzeivuotuojim kaidā nu Latgolys pogostu i pasaronuotu par dzeivi i volūdys sovpateibom ite. Aiz tuo itūreiz aicynojam jius īsapazeit ar Seiļukolnu i itīnis ļaudim. Seiļukolns ir apdzeivuota vīta, niu jau Preiļu nūvodā. 

Suprātkuos Seiļukolnā pīsadola: Seiļukolna pogosta puorvaļdis vadeituoja Iveta Broka-Kazāka, kas ir seiļukaļnīte jau daudzuos paaudzēs. Ilgus godus struoduojuse vītejā školā par školuotuoju. Pensionars Jezups Krasovskis, kurs kasdīnā aizaraun ari ar numesmatiku, galdnīceibu i vysa kū cytu.  Bibliotekare Natālija Sondore, kura ite dzeivoj jau vaira nikai 40 godu. Povuore i gūdu saimineica Marija OpolaisSeiļukolna kulturys noma vadeituoja Anita Upeneica, kas tur ryupi par vītejim pošdarbeibys kolektivim i kulturys aktivitatem jau 34 godus. Treju bārnu mameņa, vītejuo aktiviste Iveta Sondore. Medicinys darbineica, kura garus godus struoduojuse Seiļukolna feldšeru punktā Anita Vaivode. Vītejuo audieja, postneica, niu jau pensionare, deveņdesmitgadneica Tekla Opolais.