Ari itymā godā „Kolnasātys” rodūšuo komanda beja otkon nūbraukuse iz suprātkom aba vakariešonu, kab kluotīnē sasatyktu ar vītejim īdzeivuotuojim kaidā nu Latgolys pogostu i pasaronuotu par dzeivi, tradicejom i volūdys sovpateibom ite. Aiz tuo itūreiz aicynojam jius īpasazeit ar Preiļu nūvodā asūšū Vuorkovu i iteinis ļaudim, īsaklauseit jūs dzīsmēs.

Suprātkuos Vuorkovā pīsadola: jaunuo literate i sabīdriskūs attīceibu specialiste pošvaļdeibā Dagnija Dudarjonoka, pensionare i teicieja Valentīna Mačāne, vuorkavīte trešajā paaudzē, pensionare Irēna Leikuča, vuorkavīte niu jau pīktajā paaudzē, deveņdesmitgadneica, teicieja, nazkodejuo kuozu saimineica Bronislava Gavare, Vuorkovys vydsškolys školuotuoja Sandra Lazdāne, Vuorkovys vydsškolys latvīšu volūdys i literaturys školuotuoja Silvija Stankeviča, vysmoz catūrtajā paaudzē vuorkavīte, nūvodpietnīceibys muzeja vadeituoja Elvīra Āboliņa.

Vuorkova ir na vīna, bet vasalys divejis. Vīna pi Dubnys upis, saukta par Muižys i bazneicys Vuorkovu, sovpus ūtra ir drupeit vaira iz Preiļu pusi, saukta par Školys i pogosta Vuorkovu. Niu vīnu sauc par Vuorkovu, sovpus ūtru par Vacvuorkovu, bet sovā byuteibā tuos obejis ir kai vīns vasals.  Myusu satyktuos vuorkavītis ir na viņ lobys dzīduotuojis, bet ari lobys stuosteituojis, aiz tuo gasteišonu vīsmīleigajā i autentiskajā Vuorkovā turpynuosim ari cytys nedelis raidejumā, kur vaira pīsavērssim volūdai i ituos pusis dzīsmei.