Laikā, kod dīnys tymsuo daļa ir vysā garuoka nikai gaišuo i daudzys īrostuos uorpus sātys aktivitatis ir gona īrūbežuotys, tūstorp ari daleiba amaterkolektivūs i kūpeiga saīšona, juovaicoj piec cytu aktivitašu – vīnam ci sovā saimē. Aiz tuo ītūreiz mes jius aicynojam kūpā ar mums nūbraukt iz Rēzeknis nūvoda Kaunatys pogostu, kur dzeivoj i saiminīkoj Sutinu saime. Saimis golva Ivo kasdīnā struodoj par Rēzeknis zonaluo vaļsts arhiva direktoru, juo sīva Sandra  dorbojās interešu izgleiteibā tepat Kaunatys vydsškolā, kur vuicuos ari jūs meita Īva. Sovpus dāls Inguss, kurš sarunā napīsadaleja, jau ir students i taipat kai muosa vuicuos ari J. Ivanova muzykys vydsškolā. Runuosim par tū, kai jī itūšaļt pavoda garūs vokorus i kamā rūn mīru i pīpiļdejumu. Par muziciešonu sātā, attuolynuotū vuiceišonūs, ituo laika plusim i minusim.

 „Bārni mums ir profesionaluoki muziki, jo jī vysmoz notys pazeist i zyna, kai muzykai ir juoskaņ. Es koč kū asu raudzejs tikai pošvuoceibys ceļā – gitaru pastrynkšynuoju, piečuok garmani pasavuiceju spieļuot. Sandra ari tikai pošvuiceibys ceļā vysu, ir klavīris spieļuojuse.

Tys laikam jau ir bejs mums taids bierneibys sapyns, ka gribiejuos vyuceitīs muzyku i niu tys ir pīsapiļdejs myusu bārnūs...

Muzyka – tei ir taida vierteiba, kura tev vysu myužu īs leidza i tev tū nivīns naatjims. Ar muzyku var vysu izdzīduot i dzīdynuotīs.”