Pyrmssvātku raidejums itūreiz veļteits divejim izcylim Latgolys Ontonim – literatam, muokslinīkam, aktīram, režisoram i kulturys darbinīkam Ontonam Kūkuojam, kam 23.decembrī palyktu 78, i Latgolys patriotam, dzejnīkam, literatam, fokloristam Ontonam Slišānam, kam 28.decembrī palyktu 70.

Raidejumā sasateikam ar Ontona Kūkuoja dālu latgalīšu dzīsminīku Vinsentu Kūkoju. Par sovu tāvu, kurais myužeibā aizguoja 2007.godā, jys soka:

“Jys teišom beja tys Latgolys guojiejs. Jys guoja pretim vysim, smaideja, saprota ari tū, kas beja nūkrits voi paklups i mekleja sovuos dzejis rynduos ari taidu atspierini, lai tys cylvāks varātu ari pasaceltīs.”

Sovu tāvu jys raksturoj kai nasavteigu i cīž mierktīceigu, kas prota panuokt sovu, bet par vysu svareiguokais jam beja dzimtene, tauta, Latgola i saknes. Jis beja sovys tautys kolps, kas varēja tai kolpuot sevkurā veidā. “Ja jis varēja paleidzēt kai režisors, tod jys guoja kai režisors, i vīnolga voi tys ir teātris, kurš ir guvs panuokumus, voi tī ir vīnkuorši pīci cylvāki, kas sasalasiejuš i sadūmuojuš, ka mes tagad spielēsim teātri. Tys beja vīnolga. Nabeja nikaidys savteibys.”

Vinsents pats ir latgalīšu dzīsminīks, kurais vysbīžuok ņiu uzastuoj ar dālu Rihardu, i kuram 2017. godā izguojs ari muzykys albums “Breineiguo nosta”. Vaicuots par dzīsmu radeišonu, Vinsents atzeist – tei ir Dīva duovona, i pīmiņ sova drauga dzīsminīka Valda Atāla saceitū – roksti voi saceri dzīsmi tod, kod tu vairs navari nasacerēt.

Sovpus 28.decembrī 70 godu jubileju svynātu Ontons Slišāns - Latgolys patriots, dzejnīks, literats, folklorists i sabīdriskīs darbinīks, kurš nu jau pyrma astoņim godim devīs myužeibā.

Ontons Slišāns sovu myužu veltiejs latgalīšu tradiceju apzynuošonai i īdzeivynuošanai, ari latgalīšu volūdys styprynuošonai. Vuocis mutvuordu i muzykalū folkloru sovā pusī, ari dybynuojs Rekovys i Upītes etnografiskū ansambli, reikuojs latgalīšu folklorys pasuokumus. Ontons ari beja pyrmais, kas rakstiejs bārnim dzejūļus latgaliski.

„Arī pyrmuo gruomota, kū jys izdeve, ir bārnim, jū kai jys pats sacieja - vajadzēja nūvērtēt, voi juo dorbi kaidam ir vajadzeigi. I bārni ir vyspatīsuokuo publika,”

stuosta Ontona dāls i juo aizsuoktū tradiceju i iniciativu turpynuotuojs Andris Slišāns.

Ontona daiļrade niu dzeivoj ari Rēzeknis nūvoda vokaluos studejis "Skonai" izdūtajā diskā. Skonai vadeituoja Guntra Kuzmina-Jukna atzeist, ka dzīsmis ar Slišāna dzeju topušas puorsteidzūšai vīgli.

Niu ari Andris ar sīvu Ligitu turpynoj tāva Ontona aizsuoktū dorbu – voda muokslys kolektivus i namaterialuos kulturys centru „Upīte”. Ontona meita Annele atjaunoj vactāva sātu pošā pīrūbežā i auž dečus. Sovpus meita Māreite taipoš kai tāvs roksta i publicej dzejūļus. Bet meita Lienīte latgaliskū goru pasamona īdzeivynuot ari Latvejis Nacionalajā teātrī, struodojūt par gaismu muokslineicu.