Itūreiz raidejumā klausīs sarunu ar dekšuorīti Pīteri Justu, kurš saleidzynūši naseņ pīskaitoms ari tautys muzykantu saimei. Latgolā tautys muzyka vēļ arviņ ir dzeiva, koč ari vacmeistaru kliust mozuok, tai pīzeist ari Pīters. Dekšuorīts spieļoj gon divryndu garmanis, sauktys ari par hromku, gon ari sovu tīsu sarežgeituokuos treisryndu Pīterburgys garmanis, kuru sovpateiba ir taida, ka plešūt vaļā skaņ cyta tonalitate nikai taisūt cīši.

„Muna vysleluokuo vieleišonuos niule ir īsavuiceit skaistai spieļuot treisryndu ermonikys. Kū nūzeimoj skaisti? Tai, lai vysim pateik, natikai pošam. Pošam, saprūtams,ari.” Vēļ kaids nu Pīera sapynu ir dabyut sovā eipašumā vysu tonalitašu garmanis.

Īspiejams vīnu nu unikaluokom seņejūs garmaņu kolekcejom iz Varakļuonu nūvoda Dekšuorem beja nūbraucs apsavērt Ēriks Zeps.

 

***

Pyrma diveju godu Daugovpiļs nūvoda Silenē atrosta unikala, aptyvai 100 godu vaca stykla foto negativu kolekceja. Vaira nikai 180 negativu niu ar profesionalu fotografu paleidzeibu ir atjaunuoti, digitalizēti i tūs kopeju izstuode apsaverama Daugovpiļs nūvoda Skrudalīnys pogosta Skrudalienā. Tī pabeja i vaira par itū izstuodi sižetā stuosta Ausma Sprukte. Sovpus poša izstuode i stykla platis ari iz prīšku byus apsaveromys daudzfunkcionalajā centrā “Skrudaliena”.

***

Viesturis rubrikā Kaspars Strods turpynuos īprīškejā raidejumā aizsuoktū temu i pastuosteis vaira par Latgolys atbreivuošonys ceiņom pyrma symta godu, kas beja pamats Latvejis Republikys pylnvierteigai apvīnuošonai.