Svietejom 300. jubilejis raidejumu!

Valsts svātku mienesī īpazeisim latgaliskas saimis. I itūreiz gostūs Artūrs i Matīss Uškāni. Tāvs i dāls. Obeji jī ņiu dzeivoj golvyspiļsātā, kūpā muzicej folkroka grupā "Laimas Muzykanti", ir kolēģi, draugi, dūmubīdri, i kai poši atzeist dažkuort ari dūmstorpeibu bīdri.

"Radūšā komandā struodojūt īpaši izapauž, tas par kū i Blaumanis "Indrānūs" rakstēja i Dostojevskis, ka vīns vaira kur ta iz tradicejom spīž, iz pīredzi, ūtrs otkon iz jauneibys maksimalismu i progresu. Bet tys vyss paleidz veiduot tū, kū mes veidojam pošlaik. Tei ir jauna "Laimas Muzykantu" programma. I ar gola rezultatu tūmār esam apmīrynuoti vysi," tai Artūrs Uškāns.

Pēc sarunas izaicynojam Tevi, klauseituoj, uzraksteit diktatu latgaliski!

Pasauļa diktats latgalīšu rokstu volūdā pyrmū reizi nūtyka 2017. godā, īsadvesmojūt nu iniciativys “Pasauļa diktats latvīšu volūdā”. Jau ūtrū reizi pīduovojam uzraksteit diktatu viesturiskā latvīšu volūdys paveidā – latgalīšu rokstu volūdā.

Diktatā Rēzeknis Tautys teatra akters Aldis Leidums skaiteis fragmentu nu Kārļa Skalbis puosokys “Kačeiša patmalis” (izdeviejs: “Latvijas Mediji”, 2017).

Uzraksteitū tekstu sevkurs varēs puorbaudeit portalā lakuga.lv. Diktata teksts sastateits, īvārojūt 2007. godā apstyprynuotūs Latgalīšu raksteibys nūsacejumus.