“Lai tradiceja dzeivoj” – taids zeimeigs nūsaukums dūts lopai socialūs teiklu vītnē Facebook, kuru attaisūt, redzim vysaiduoku Ludzys nūvoda apleicīnis krucifiksu biļdis i aprokstus. Vaira par itū aktivitati mums pastuosteis Ausma Sprukte. Lopu “Lai tradiceja dzeivoj” napaseņ sataiseja Jura Soikāna Ludzys muokslys školys komanda ar mierki viesturis vierteibu saglobuošonā īsaisteit ari vītejūs īdzeivuotuojus. Turpynoj lopys administratore i muokslys školys direktore Sandra Vorkale.

„Mums Ilga Rudoviča atsausaucēs izreiz, tod atsasaucēs Vitālijs Filipenoks, Zylupis muoceituojs, kurš ari pats veidoj krucifiksus, i taids cylvāks, kuru es myužam ari vēļ naasu redziejuse, Agris Pontāgs, kurš vīnkuorši ir ceļuojs i fotografiejs, kab piec tam īvītuotu tūs materialus Google ceļuojumu mapē.”

Informacejis apkūpuošona par Ludzys nūvoda krucifiksim ir vīna nu storptautyskuo puorrūbežu projekta daļu. Projektā pīsadola ari boltkrīvi i leitovīši i da šam juo laikā atjaunuots muokslys školys kūkapstruodis kabinets, organizāti vairuoki seminari i cytys aktivitatis, lelu viereibu davieršūt senejom ar kūku saisteitom tradicejom, izsver Jura Soikāna Ludzys muokslys školys školuotuoja Iveta Ladusāne.

„Es īmūt paceļu golvu iz šķiuņa viersu, patiemeju, iz kaidys muojis viersu, iz kaida lūga malenis, jā, teiri personeigi, taids izzynūšais moments ira, nui. Dīva zeime ir īlykta ci vēļ kas nabeis. Foršys atkluosmis guoja ari nu myusu draugu leitovīšu, kod seminara laikā eistyn cylvāks slādze kameru, guoja duorzā i ruodeja krucifiksu, kas jai ir pi sātys.”

Dyžan atzineigi ludzuonīšu iniciativu viertej Bolvu Centraluos bibliotekys direktore Ruta Cibule, kurei da šam ar desmit godu storplaiku pieteja krystus Zīmeļlatgolā.

„Latvejā vysā moz ir sasaglobuojs tuodu tradicionaluos kulturas formu, kurys vēļ pastuov pošas par sevi, kuras funkcionej naorganizātā veidā. Pa treis, pa četras buobines i kuods vecelīts aizīt i dzīd. Tys vēļ ir tys iestums, kas ir dzeivs.”

Krystu stuostu izzynuošona nav vīgls dorbs, ir juosaprūt, ka kotram krucifiksam ir koč kaidys sovpateibys, kaids ir pamasts, cyts sakūpts, vēļ vīnu darynuojs profesionals muokslinīks, ūtru – vītejais pošdarbnīks, par tū ir cīši svareigi, veicūt taida veida pietejumus, sasadorbuot taišni ar vacuokuos paaudzis vītejim īdzeivuotuojim, stuosta Bolvu Centraluos bibliotekys direktore Ruta Cibule.

„Itī objekti nav tī, kas poši svīžās acīs. Nui, jī ir juojādz īraudzeit. Juopaprosa vītejī cylvāki, lai paleidz īraudzeit. Prūtams, vysinteresantuokī ir tī, kuri ir nanūsokama vacuma, jo tī ir nu tuodi, saceisim, varbyut na tik meistareigi darynuojumi, bet jī meili ir ar tū, ka jī ir tuodi nu drusku jūceigi, drusku naprasmeigi. Nui, bet jī ir eisti, ar tū cylvāka dvēseli, kas jūs darynuojs, cīma amatnīks kuods voi kas jū darynuojs.”

Ari Jura Soikāna Ludzys muokslys školys direktorei Sandrai Vorkalei ir sovi īsacjumi, kam īdzeivuotuoji aicynuoti dagrīzt vaira viereibys.

„Jūs var atrast pi bazneicu, tys ir vīns leimiņs, ūtrs leimiņs – kopsātys, trešais leimins ir cīmatūs i pi privātūs sātu.”

Vīns nu rezultatu informacejis savuokšonai par krucifiksim i jūs liktini byus jaunys kartis izveide ar jūs atsarošonys vītom, taipoš Sandra Vorkale cer kūpeigim spākim motivēt cytam cytu krucifiksus atjaunuot. Biļdis ar nūruodi par jūs autoru, kai ari krucifiksu tradiceju stuostim Jura Soikāna Ludzys muokslys školys komanda gaideis leidz 4. martam, sovpus piec tam socialajā teiklā Facebook varēs pīsavīnuot vēļ vīnai jaunai lopai – par kūkgrīzumu elementim sātuos.