Decembra golā, Bolvu nūvoda Upītē slāgtuos školys sātā tyka atkluota izalauzšonys ustoba-spēle latgaliski – „Pīci panti”, kas ir veļteita nūvodpietnīkam, dzejnīkam, folkloristam Ontonam Slišānam (1948–2010) i byus daīmama kotram spēlēt grybātuojam. Vaira par tū klausitēs Ausmys Spruktis sagataveitajā sižetā.

Upītē 28. decembris ir zeimeigs datums, jo tei ir dīna, kod dzims Ontons Slišāns. Kab tū izceļt, kotru reizi ite teik organizāta kaida eipaša aktivitate. Ideja par izalauzšonys ustobu pyrma pusūtra goda roduos vītejuos folklorys kūpys dalinīkim i Andra Slišāna saimei. Turpynoj Ontona Slišāna dāls, Namaterialuos kulturys montuojuma centra „Upīte” direktors Andris Slišāns.

„Tuo kuo Ontons nu iteines ir, juolīk Ontons. Tuo kuo mes ešam Latgalie, latgalīšu volūda juolīk. Tuo kuo Ontons ir daudz kūps folkloru, nematerialū kulturu, tod tys ari ir īkšā, plus juo hobijs – bits.”

Piec vīna goda puortraukuma niu Upītē otkon ir izsludynuots ari rodūšūs dorbu konkurss ar mierķi aplīcynuot pīdareibu sovai dzymtajai pusei, kai ari styprynuot latgaliskū kulturidentitati, vaira viestej Andris Slišāns.

„Aicynojam gon školnīkus, gon ari pīaugušūs cylvākus, voi nu zeimuot voi raksteit, voi nu abejus kūpā dareit. I šūgoda tēma myusim ir izdūmuota, saīt muns mīļuokīs Ontona dzejūļs „Kotru godu kuods breinums nūteik...”, tod tymā var izapaust jebkurš. Voi uzraksteit kuodu stuostu, posoku, dzejūli voi uzzeimuot kaut kū, kas īt pruotā.”

Rokstu i muokslys dorbus var īsnēgt da 10. janvara, syutūt pa postu, izmontojūt pakomatus, rokstūt iz e-postu voi ari personeigi atnest iz Upītis biblioteku.

Ontona Slišāna literarī dorbi izdūti 30 gruomotuos, jis ir pīrakstejs Zīmeļlatgolys folkloru, vadejs ituos apleicīnis etnografiskūs ansambļus. Jam veļteituo rodūšūs dorbu konkursa nūslāguma pasuokumu nūtiks 18. janvarī, kas reizē ir ari Ontona vuordadīnys datums.