Cik lela ir pasaulī leluokuo Latgolys pūdu kolekceja i deļ kuo ir vārts atsagrīzt dzymtajā pusī i audzynuot bārnus latgaliskā lauku vidē? Rubrikā “Vuordineica” rakstnīks i literaturzynuotnīks Valentins Lukaševičs i muzikis Arņs Slobožanins atkluoj vuorda “vērtive” nūzeimi.

Šūreiz raidejumā gastejam pi Anetes i Gata Urkom, kas pyrma nailga laika atsagrīzuš iz dzeivi dzymtajā vītā -  Viļānu nuvoda Dekšuorēs, audzynoj treis bārnus, bet naseņ Varakļuonūs uzsuokuš ari sovu biznesu - atkluojuši kopeineicu-gruomotneicu.

Taipoš dūdamēs iz Latgolys Kulturviesturis muzeju, kab apsavārtu kruojumu, kur globojās vīna nu leluokajom pasaulī Latgolys keramikys kolekcejom.

“Andreja Paulāna pūdi, Ontona Šmulāna daudzveideigī velneņi, dekorativys seikplastikys figureņis, Pētera Kises ugunsputni, Jura Krompāna, Ādama Kuopusteņa dorbi ar uzrokstim iz krūzem ....” kolekceju izruoda golvanuo kruojuma globuotuoja Ināra Krancāne.

“Keramikys kolekceja aptver nu 18.-21.gs dorbus. Senuokais saimnīceibā lītuotais trauks, kas atsarūn muzeja kolekcejā ir Silajuoņu pogosta Rībeņu sādžys pūdnīka Andreja Skābes darynuotuo pīna krūze.”

Vaira nakai 130 autoru 2800 zaļi, dzaltoni, bryuni, zili i sorkoni acs žylbynūši i pūdnīka meistareibu aplīcynūši glazātuos keramikys dorbi mejās ar malnim i palākim svāpātim, raibim, rudzu īraugā ryudeitim i pavysam boltim pūdim, rokstainim škeivim, vāzem i majestatiskim svečturim, voi amizantim velneņim. Tys vyss muzeja kruojumā ir vysaiduokuos ekspedīcejuos dabuots, nūpierkts ci duovynuots.

 

Rubrikā “Vuordineica” rakstnīks i literaturzynuotnīks Valentins Lukaševičs i muzikis Arņs Slobožanins atkluoj vuorda “vērtive” nūzeimi.