Jau sastū godu nūteik Latgalīšu kulturys bīdreibys īdybynuotais, Nikodema Rancana vuordā nūsauktais konkurss Latgolys  pedagogim. Vēļ leidz 13. oktobram sevkuram dzeivuotuojam ir īspieja dasaceit sovu vyslobuokū Latgolys regiona školuotuoju itai bolvai, kurei vysaiduos nominacejuos svineigi tiks padūta jau 29. novembrī Rēzeknis nūvoda Nautranu pogosta Rogovkā. Ite kasdīnā dzeivoj ari vīna nu pārnejuo goda bolvys sajiemieju, školuotuoja Maija Gailuma.

„Ostoņūs nu reita es jau asu školuotuojs i ostoņūs vokorā es vēļ asu školuotuojs, jo puorskotu periodiku, apsaveru gruomotys... Asu cylvāks orkestris, suokumā beja viņ pamatprīškmati – zeimiešona, gleznuošona, veiduošona. Tod 1995. godā aizstuovieju floristikys amata meistara diplomu, leidz ar tū tyka pīduovuotys vadeit ari stuņdis ar materialu veiduošonu.”

Latgalīšu kulturys bīdreibys vadeituojs Jurs Viļums izsver, ka itymā godā eipaši teik aicynuoti dasasaceit tī školuotuoji, kuri ryupejās par latgaliskūs vierteibu styprynuošonu i kuri ir gotovi sagataveit ari vysmoz vīnu video nūdarbeibu.

„Praktiska īspieja redzēt, kū jis dora vuiceibu stuņdēs, kai vuica. Tys ir lobs veids kai nūskaidruot, kurīs školuotuojs ir lobuokais, plus itaidā veidā mēs dabuosim nalelu, bet vys tik datu bāzi, kū mes nuokameibā varēsim pīduovuot izmontuot cytim školuotuojim vuiceišonys procesā.”

Konkursa nūlykumu i tam pīvīnuotū dasacejuma anketu vaicojit Latgalīšu kulturys bīdreibys sātyslopā, kai ari latgalīšu kulturys ziņu portalā lakuga.lv.