Rēzeknis nūvoda Strūžānu pogosta „Vonogmuojuos” dzeivoj i saiminīkoj Rita Gabrusāne-Bogdanova i juos veirs Aleksandrs Bogdanovs. Rita ir vetuorste i vysaiž cytaiž aktiva personeiba, kura muzicej ari grupā „Paprika”. Piec augstškolys absolviešonys jei atsagrīzuse dzymtajā pusē, kur niu īkūpta saimisteiba. Kai stuosta poša Rita, ite jī tur vysu tū dzeivū radeibu, bez kurys dzeive laukūs nav īsadūmojama.


„Aizasuoce vyss ar pīna gūvu krustuošonu. Piec tam mozim sūlim puorguojom iz galis lellūpu audziešonu. Šūbreid ar vysim telim mums ir ap treisdesmit lūpeņu. Vīna slaucamuo gūvs ir palykuse, tys deļ sovu vajadzeibu – pīna, kriejumu i bīzpīna. Ir divejis kozys, kazlieneni pīdzymuši i kur ta nu bez vystu.”

Sātys dorbūs Ritai ar Aleksandru leluokī paleigi ir bārni Ance i Roberts, kai ari Ritys mama Anna. Taišni nu mamys Rita dabuojuse pyrmuos zynuošonys i pīredzi par veterinarū medicinu. Tys ir cīši svareigi, ka ari cytys paaudzis puorjāmušys lelū mīlesteibu pret dzeivnīkim, tai izsver Ritys mama Anna.

„Es, kod staiguoju izsaukumūs, jei jau nu sešu godu dzeraunē, ka kurš atļuove staiguoja vīna poša špricēt lūpus. Jārus, syvānus špricēja.”

Pyrma gondreiž desmit godu Rita kūpā ar mamu izveiduoja sovu veterinarū centru Rēzeknis vacpiļsātys centrā.
Tuoļuok iz prīšku Rita cer, ka varēs paplašynuot klinikā laboratoriskū izmekliejumu kluostu, sovpus saimisteibā laukūs nu jau sovu pīredzi tuoļuok nūdūt i bārnim.