Saruna ar vīnu nu jaunuokūs katuoļu bazneicys prīsteru Latvejā, kurais  tyka ordināts pyrma sešu godu, Juri Skuteli. Jau kaidu šaļti jis ir Ludzys draudzis vikars. Dzims i audzs katuoļticeigā saimē, vys tik nūpītnuoka interese par kolpuošonu Dīvam rodusēs vydsškolys laikā, īmūt svātceļuojuma iz Aglyunu. Ar Juri runuosim par jaunīšim, jūs īsaisti bazneicys dzeivē, izvēlem, kas juoizdora, veidojūt sovu dzeivi i aizvodūt kasdīnu.


„Es aicynuotu īsaklauseit, prūtams, cytūs cylvākūs, tyvinīkūs, kuri jius labi pazeist. Taipat īsaklauseit ari sovā sirdī, jo bīži viņ Dīvs, kurais myus radejs, īlīk sirdī aicynuojumu, ilgys, kas eistyn var dareit laimeigu. Pīpiļdeit dzeivi, kaba tei nabyutu tukša, bet ar gondarejumu nūdzeivuota. Veļteit laiku klusumam, puordūmom. Nasabeit nu tuo, iz kū Dīvs aicynoj. Bīžai var dzierdēt, ka jaunīši beistās cytu prīškā piļdeit tū syuteibu, iz kuru jī teik aicynuoti. Ari tys, ka myusdīnuos daudzi dzanās piec lelys naudys, karjerys īspiejom, aizmierstūt tū, ka tys nav juo sirds aicynuojums. Nu sovvys i ari cytu pīredzis es līcynoju i ari aicynoju nasadzeit piec boguoteibys, bet dzeitīs piec sirds aicynuojuma, kas eistyn pīpylda, dora laimeigu i ir lels gondarejums par tū, ka dori tū, kam asi radeits.”