Raidejuma „Kolnasāta” vuordineicā literate Ilze Sperga mums pastuosteis par kaidu seneju baltu ciļmis vuordu – apliek. Latvīšīm ir vuords aplinkus, leitovīšim ir vuords aplink, aplinkuj, tys ir tys pats myusu ‘apliek’. Vysā Latvejā itys vuords ir zynoms, i tys ir tymā pošā nūzeimē, kai mes jū šudiņ lītojam i lītuotu. Nu kureinis itys vuords īt, ka jis ir gon latvīšim, gon leitovīšim? Izaruoda, kai Konstantins Karuļs sovā etimologejis vuordineicā soka, ka tys ir nu verba ‘lenkt’, nu vēļ vacuokys indoeiropīšu saknis – lenk, kas nūzeimej tū pošu – lenkt, liekt. Ilze pīzeist, ka myusu folklorys tekstūs var atrast cīši daudz vysaidu ituo vuorda formu lītuojumu.


Golā pīduovojom jums divejis meiklis, atminiejumus drūsai varit raksteit komentarūs:
•    Četri budavoj, pīktais apleik staigoj.
•    Ni puori puorīt, ni apliek apīt.