Tyvojās Vysusvātuokuos Jaunovys Marijis dabasūs uzjimšonys svātki Aglyunā, kū varātu saukt par katuoļticeigūs leluokajim svātkim Latvejā i Latgolā, kod tradicionali runojam par lelū krystaceļu 14. augusta vokorā, golvonū Svātū Misi 15. augustā, i, saprūtams, svātceļnīku tyukstūšom, kas itamuos dīnuos īsarūn Aglyunā. Aglyuna tykuse ari pi storptautyskys svātvītys starusa. Itūreiz runuosim na viņ par gaidomajom nūtikšonom Aglyunā, bet ari par tū, kai mes poši ite, Latgolā, itū svātvītu saprūtam, kai tei izaver storptautyskā kontekstā i cik Aglyuna varātu byut interesanta kai storptautysku svātceļnīku golamierkis leidzeigi, kai tys ir Santjago Spanejā, Vatikans, Lurda Francejā voi Fatima Portugalē.
Sarunā pīsadola Jākubs Rodions Doļa, doktorants Gregora Pontifikalajā universitatē Ruomā, Ludzys katuoļu draudzis pravests i Ludzys dekanata dekans, Inese Runce, viesturis doktore, Latvejis Universitatis Filozofejis i sociologejis instituta vodūšuo pietneica i Vēsma Ušpele, muokslineica, gleznuotuoja i pūdneica.