Vīns nu drūšeibys vaicuojumu, kas eipaši byutiskys pīrūbežā i Latgolā, ir sabīdreibys uzteiceiba tīsu varai.

Pādejā laikā tīsu sistemā īvīš lobuojumus i runoj par dorba efektivizaceju. Kai procesi vierzejās, jemūt vārā ituos dīnys realitati i izaicynuojumus vaļsts drūšeibys aspektūs i asūšajā geopolitiskajā situacejā, cik itei uzticeiba tīsu varai nūsastyprynoj, kai vaļsts drūšeibys vaicuojumi niu mainejuši dorbu tīsā, runojam ar Tīslītu padūmis i Augstuokuos tīsys prīšksādātuoju Aigaru Strupišu.

“Latgolai ir divi izaicynuojumi – cylvāku aizplyušona nu lauku iz piļsātu, i ūtrys – tys, ka suonim ir agresorvaļsts Krīveja i Boltkrīveja. Ari cylvāku nacionalais sastuovs – Latgolā ir mozuoka daļa latvīšu nakai cytur Latvejā, bet vīna nu Kremļa politikys ideju ir aizstuovēt krīvyski runojūšūs cytuos vaļstīs, tys roda lelus riskus taišni Latgolys kontekstā.”

Aigars Strupišs ir nu Latgolys, nu Viļānu, par Tīslītu padūmis i Augstuokuos tīsys prīšksādātuoju jū Saeima ar vysā vīnpruoteigu bolsuojumu īcēle 2020. gods vosorā.

“Lykumi ir lobi, lykumūs nav vaine, vaine ir cylvākūs,”

runuodams par vardarbeibys mazynuošonu, Aigars Strupišs kai problemu nūruodeja darbinīku tryukumu policejā. “Par pīmāru, policejā tryukst 40 % policistu, lai ceineitūs pret vardarbeibu, vajag patruļdīnastu, kas apsekuotu tuos saimis, bet kai var nūdrūšynuot drūšeibu, ka pusis policistu nav. Tys ir lels caurums myusu sistemā.” Aigars Strupišs nūruoda – cylvāki, kūpumā sabīdreibā, vardarbeibu naiztver kai lelu problemu. Ir ES pietejumi, kas paruoda, ja cytur Eiropā vardarbeibu saimē par napījemamu skaita 80 %, tod Latvejā tī ir tikai 40–50 %. “Problema nav lykumā, bet policistu i izmaklātuoju izpratnē par vardarbeibu.”

Jis pīzeist, ka tys, ka socialajūs teiklūs, masu medejūs aizviņ vaira cylvāki runoj par vardarbeibu, par lītom i vaicuojumim, kas jim napateik ari tīsu sistemā, nūruoda iz sabīdreibys izaugšonu. “Ir labi, ka sabīdreibai ir reakceja, tys ruoda, ka sabīdreiba dūmoj i atsateista.”