Kreitūšs apmatums, pūds pi attaiseitu durovu, pastaigu tryukums svaigā gaisā – ar itaidu skorbu aprokstu suocēs augusta suokuos Tīseibsorga biroja publicātais viestejums par situaceju Rēzeknis pošvaļdeibys Pensionaru socialūs pakolpuojumu centrā. Tī konstatāta viertine puorkuopumu, dzeivi itymā pansionatā saucūt par pazamojūšu.
Rēzeknis vaļstspiļsātai da goda gola jau bez itūs konstatātūs puorkuopumu itūšaļt juosaceinej ar palelu vairuoku miļjonu eiro rūbu budžetā, kas draud ar finaņšu stabilizacejis procesa aizsuokšonu pošvaļdeibā. Tok leluokim īguļdejumim socialajā sferā naudys nav, ari Eiropys fondi tam leidzekļu atseviški naparadz. Pošvaļdeiba sasajiut īdzeita strupceļā.

Voi Rēzeknis pansionatā atkluotais ir izjāmuma gadīņs voi sistema i kai padareit lobuoku dzeivi pensionaru socialūs pakolpuojumu centrā, diskutēs Rēzeknis socialuo dīnasta vadeituojs Gunārs Arbidāns, Rēzeknis vaļstspiļsātys pošvaļdeibys vadeituojs Aleksandrs Bartaševičs (Kopā Latvijā), Tīseibsorga biroja Piļsūniskūs i politiskūs tīseibu nūdalis Prevencejis dalis vadeituoja Liene Namniece-Bērziņa, Lobkluojeibys ministrejis vaļsts sekretara vītineica Elīna Celmiņa.