Aizvadeituo goda golā Aglyunā tyka padūtys Latgolys Turisma goda bolva i nūsarysynuoja Latgolys Turisma konference. Tok jau februara suokumā Reigā byus kasgadejuo turisma izstuode “Balttour”, kur ar sovu pīduovuojumu ceļuotuojim i turisma interesentim tiks pīduovuots ari nūbraukt iz Latgolu. Ar kaidu pīduovuojumu Latgola kai regions itamā sezonā īsaspaituos kūpejā Latvejis i storptautyskuo turisma pīduovuojumā, i kaidys sekys iz turistu pīplyudumu Latvejis–Krīvejis i Latvejis–Boltkrīvejis pīrūbeža regionā ir pamets pyrma goda Krīvejis aizsuoktais kars Ukrainā, tū itūreiz puorrunojam ar turisma nūzaris cylvākim. Studejā gastej Latgolys turisma asociacejis “Ezerzeme” vaļdis lūcekle, Ludzys nūvoda Turisma informacejis centra vadeituoja Līga Kondrāte i turistu gids Rēzeknē, gids Rēzeknis Zaļajā sinagogā, žurnalists i kulturys darbinīks Voldemārs Ivdris, bet attuolynuoti sarunai dasavīnoj Ilze Stabulniece – Kruoslovys nūvoda zygu sātys “Klajumi” saimineica, kas sajāmuse Latgolys turisma Goda bolvu 2022 nominacejā “Lolitys Kozlovskys izcileibys bolva turismā” i Iveta Kravale – Latvejis Investiceju i atteisteibys agenturys Turisma departamenta vacuokuo projektu vadeituoja.