Latvejā godā vīns cylvāks roda videji 1,8 m3 voi aptyvai 412 kg naškiruotūs atkrytumu, iz vysa mozuok – lauku vīnsātuos, vysa vaira – daudzdzeivūkļu sātuos. Kūpā vaļstī kas gods teik radeits ap 745,7 tyukstūšom tonnu sadzeivis atkrytumu, nu jūs škiruota teik viņ aptyvai pīktuo daļa, līcynoj dati, kū par 2018. godu publicējuse atbiļdeiguo ministreja.

Ir vysaidi leluoki i mozuoki, plotuoki i mozuok ploti dokumenti, kur nūsprausti atkrytumu apsaiminīkuošonys, jūs vydā atkrytumu daleituos vuokšonys i škiruošonys mierki. Tai, pīmāram, premjeris Evikys Silinis vadeituo Ministru kabineta deklaracejā saceits: „Plotuok integrēsim apritis ekonomikys principus uzjiemiejdarbeibā, lai produktu, materialu i resursu vierteibu piec vareibys garuok saglobuotu tautsaimisteibā, kai ari samazynuotu atkrytumu rasšonūs.”

Bet Eiropys Savīneibys (ES) direktivys, kurys ari Latveja ir apstyprynuojuse, nūsoka, ka vysom ES daleibvaļstim da 2035. gods atkrytumu poligonūs nūglobuotūs sadzeivis atkrytumu daļa juosamazynoj da vysmoz 10 % nu kasgadejuo sadzeivis atkrytumu daudzuma. Itūšaļt poligonūs nūglobuoti teik videji 45 % saražuotūs atkrytumu. Vaļsts vidis dīnasts vēļ pārņ, taisūt sadzeivis atkrytumu poligonu puorbaudis, konstatēja vairuokys napiļneibys, kas var kavēt voi līgt Latvejai sasnēgt Eiropys Savīneibys nūsaceitūs mierkus, tai kai niu poligonūs teik i saīt nūglobuot lelu daudzumu īpakuojumu materiala, kas byutu dereigs puorstruoduošonai vēļ reizi.

Atkrytumu škiruošonys tendeņcis kūpā uzaloboj, niu dorbojās depozita sistema, vystik dzeivuotuoju īrodumu puorsameišona prosa laika. Tymā pošā laikā Latgolys ūtrajā leluokajā piļsātā Rēzeknē niu jau vaira nakai godu atkrytumu škiruošonys vareiba īdzeivuotuojim ir samazynuota – aiztaiseits vīneigais atkrytumu škiruošonys laukums. Koč i īdzeivuotuoji teik aicynuoti škiruot atkrytumus, tai samazynojūt sovus izdavumus par atkrytumu apsaiminīkuošonu, pi vysu daudzdzeivūkļu sātu daleituo atkrytumu savuokšona vys vēļ nateik nūdrūsynuota.

Kaidi rysynuojumi tam, lai vaļstī i ES nūspraustūs mierkus atkrytumu saimisteibā sasnāgtu, kai ari tū, kai par itū teik runuots ar sabīdreibu, sarunā ar Klimata i energetikys ministrejis Vaļsts sekretara vītineicu vidis politikys vaicuojumūs Rudīti Veseri, Rēzeknis vaļstspiļsātys pošvaļdeibys izpiļddirektora aizdavumu izpiļdeituoju Ivetu Ciprusi, kai ari SIA „ALAAS”, kas snādz atkrytumu apsaiminīkuošonys pakolpuojumus Rēzeknis vaļstspiļsātys, Rēzeknis nūvoda i Ludzys nūvoda pošvaļdeibuos, izpilddirektoru Juriju Petkeviču.